(ម៉ូស្គូ)៖ រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា រដ្ឋាភិបាលរបស់លោក នឹងចាត់វិធានការសងសឹក បើសិនជាសារព័ត៌មានរុស្ស៊ី Russian Today ឬ RT ជាភាសាអាមេរិកកាំង ត្រូវបានគេបង្ខំឱ្យចុះបញ្ជីជាទីភ្នាក់ងារបរទេស នៅក្នុងសហរដ្ឋអាមេរិកនោះ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃពុធ ទី១៥ ខែវិច្ឆិកា ឆ្នាំ២០១៧។
ការលើកឡើងខាងលើរបស់ លោក Sergei Lavrov ធ្វើឡើងបន្ទាប់ពីសារព័ត៌មាន RT American បានចុះបញ្ជីជាទីភ្នាក់ងារបរទេស ក្នុងសហរដ្ឋអាមេរិកកាលពីថ្ងៃចន្ទ តាមសំណើពី ក្រសួងយុត្តិធម៌អាមេរិក។ «បើសិនជាយើងចាត់វិធានការសងសឹក នោះវានឹងជាវិធានការមួយដ៏សមស្រប... ហើយលោកប្រធានាធិបតីបាននិយាយថា ប្រតិកម្មតបតរបស់យើង នឹងត្រូវ ធ្វើឡើងយ៉ាងឆាប់រហ័ស និងដូចជាកញ្ចក់ឆ្លុះ»។ នេះបើតាម លោក Sergei Lavrov។
គួរបញ្ជាក់ថា សភាជាន់ទាបរុស្ស៊ី ក៏គ្រោងនឹងជួបប្រជុំគ្នាផងដែរ នៅថ្ងៃពុធនេះ ដើម្បីដឹកនាកិច្ចពិភាក្សាស្ដីពីការធ្វើវិសោធនកម្មច្បាប់ ពាក់ព័ន្ធនឹងប្រព័ន្ធផ្សព្វផ្សាយបរទេសនៅក្នុង ប្រទេសរុស្ស៊ី ហើយដែលតាមរយៈការធ្វើវិសោធនកម្មនេះ អាចនឹងទទួលស្គាល់ប្រព័ន្ធផ្សព្វផ្សាយបរទេស បំពេញមុខងារជាទីភ្នាក់ងារបរទេស។ សារព័ត៌មាន RT និង Sputnik ត្រូវបានសហរដ្ឋអាមេរិក និងបណ្ដាប្រទេសអឺរ៉ុបមួយចំនួនធំ ចោទប្រកាន់ថា បានចូលរួមជាមួយរដ្ឋាភិបាលរុស្ស៊ី ផ្សព្វផ្សាយព័ត៌មានមិនពិត ទាក់ទិននឹងការបោះឆ្នោតអាមេរិក រួមទំាងនៅអឺរ៉ុប បើទោះជាទីក្រុងម៉ូស្គូបដិសេធជាច្រើនដងក៏ដោយ៕
