(យូអិន)៖ រុស្ស៊ី ចិន អេហ្ស៊ីប និងបូឡាវី បានធ្វើពហិកា​មិនចូលរួមកិច្ចប្រជុំ​ក្រៅផ្លូវការ​មួយរបស់ ​ក្រុមប្រឹក្សាសន្តិសុខអង្គការ​សហប្រ​ជាជាតិ (UNSC) ដែលផ្តួចផ្តើម​ដោយ​សហ​រដ្ឋអាមេរិក ស្តីពីបញ្ហានៅ​វេណេស៊ុយអេឡា ដោយលើកឡើងថា ស្ថាប័ន​ដែលមានសមាជិក​​ចំនួន​ ១៥ប្រទេសនេះ មិនគួរលូកដៃ​ចូលពាក់ព័ន្ធ​ក្នុងស្ថានការណ៍​ផ្ទៃក្នុង របស់ប្រទេស​អាមេរិកឡាទីន​នេះឡើយ។ នេះបើតាម​ការ​ចេញផ្សាយ​ដោយ ទីភ្នាក់ងារព័ត៌មាន Reuters នៅព្រឹក​ថ្ងៃអង្គារ ទី១៤ ខែវិច្ឆិកា ឆ្នាំ២០១៧។

«បញ្ហានេះគឺ​ជាការចូលជ្រៀតជ្រែក​ ជាមួយកិច្ចការផ្ទៃក្នុង​របស់​វេណេស៊ុយអេឡា»។ នេះ​បើតាម​សម្តី​​របស់​អ្នក​តំណាង​​អចិន្រ្តៃយ៍​​​រុស្ស៊ី​​ប្រចាំនៅ UN លោក Vassily Nebenzia ថ្លែងប្រាប់ក្រុម​អ្នកសារព័ត៌មាន ហើយ​លោក Nebenzia បាន​បន្ថែមថា លោកសង្ឃឹម​ថាប្រទេស​វេណេស៊ុយអេឡា នឹងអាច​ដោះស្រាយបញ្ហា​របស់ខ្លួនបាន ដោយសន្តិវិធី ដោយពុំចាំបាច់​មានការអន្តរាគមន៍​ពីខាងក្រៅ​ឡើយ។

ជុំវិញការធ្វើ​ពហិកានេះ ឯកអគ្គរដ្ឋទូត​អាមេរិកនៅ UN លោកស្រី Nikki Haley បាន​និយាយថា «ការដែលរដ្ឋាភិបាល​ទីក្រុង​ការ៉ា​កាស់ បានខិតខំ​ព្យាយាមធ្វើឲ្យគេ​គ្រប់គ្នា​មិនបង្ហាញខ្លួន នៅក្នុងកិច្ចប្រជុំ​មួយបែបនេះ បានស្តែងឲ្យ​ឃើញថា វេណេស៊ុយអេឡា​ពិត​ជា​​មាន​កំហុសមែន»។

គួរបញ្ជាក់ថា វេណេស៊ុយអេឡា​កំពុងតែរងគ្រោះ​ដោយសារវិបត្តិសេដ្ឋកិច្ច​ធ្ងន់ធ្ងរ ហើយរដ្ឋាភិបាល​ប្រធានាធិបតី លោក Nicolas Maduro បានចាត់វិធានការ​ធ្ងន់ៗមិន​ញញើតដៃ ទៅលើ​គណបក្ស​ប្រឆាំង ដោយមាន​ទាំងការចាប់​ដាក់គុក និងដាក់បំរាម​មិនឲ្យ​​មេដឹកនាំ​ក៏ដូចជាសកម្មជន​ប្រឆាំង​ជាច្រើននាក់ ចូលបំពេញ​ការងារ​ថែមទៀត។

ក្រៅពីនេះ មនុស្សជាច្រើននាក់​ក៏បានស្លាប់​ផងដែរ នៅក្នុង​អំពើហិង្សា​ចាប់តាំងតែពី​បក្សប្រឆាំង​បានដឹកនាំ​សកម្មភាព​តវ៉ាទ្រង់​ទ្រាយធំ​ជាបន្តបន្ទាប់ កាលពីខែមេសា ឆ្នាំ២០១៧នេះ ដោយក្រុមបាតុករ​បាននិយាយ​ថា វិបត្តិនេះ​ទាមទារឲ្យ​មាន​ការបោះឆ្នោត​ជ្រើសរើស​ប្រធានាធិបតី​មុនកាលកំណត់ ដែលពួកគេជឿ​ជាក់ថា លោក Maduro នឹងមិនទទួល​ជោគជ័យ​នោះឡើយ៕