(តេហេរ៉ង់)៖ គ្រោះរញ្ជួយដីកម្រិត ៧.៣រ៉ិចទ័រ ដ៏កក្រើកមួយបានវាយប្រហារចំតំបន់ព្រំដែនរវាងអ៊ីរ៉ាក់ និងអ៊ីរ៉ង់ ដែលជាហេតុបានបង្កឲ្យ មនុស្ស​ស្លាប់មកទល់នឹងពេលនេះ គឺកើនដល់ ៤៤៥នាក់ហើយ ខណៈមនុស្សជាង៧១០០នាក់ទៀតរងរបួស គិតចាប់តាំងពីថ្ងៃអាទិត្យ​ម្សិល​មិញ (ពេលវេលាក្នុងតំបន់រងការវាយប្រហារ)។ មួយវិញទៀតនេះគឺជាគ្រោះរញ្ជួយដី សម្លាប់មនុស្សច្រើនជាងគេ​បំផុត​ក្នុង​ឆ្នាំ​២០១៧​នេះ បន្ទាប់ពីគ្រោះរញ្ជួយដីនៅម៉ិចស៊ីកូ ផ្ដាច់យកអាយុជីវិតមនុស្ស៣៦៩នាក់ កាលពីខែកញ្ញា។ នេះបើតាមការចេញផ្សាយដោយ សារព័ត៌មានចិនស៊ីនហួរ នៅថ្ងៃចន្ទ ទី១៣ ខែវិច្ឆិកា ឆ្នាំ២០១៧។

យោងតាមប្រព័ន្ធផ្សព្វផ្សាយក្នុងប្រទេសអ៊ីរ៉ង់ ចំណុចរំញ័រនៃហេតុការណ៍រញ្ជួយផែនដីខាងលើ បានកើតឡើងនៅ​ចម្ងាយ​ប្រមាណ​១០៣​គីឡូ​ម៉ែត្រ ភាគ​អាគ្នេយ៍​ទីក្រុង Sulaymaniyah នៃប្រទេសអ៊ីរ៉ាក់ និងជះ​ឥទ្ធិពល​យ៉ាង​កក្រើក​ដល់​ខេត្ត​ចំនួន​១៤ ឯណោះ​របស់​អ៊ីរ៉ង់ ដែលនៅជាប់ព្រំដែនជាមួយអ៊ីរ៉ាក់។

អាជ្ញាធរអ៊ីរ៉ង់បានបញ្ជាក់ឲ្យដឹងថា សម្រាប់មនុស្សស្លាប់ និងរបួសទាំងជាង៧០០០នាក់ខាងលើនេះ គឺភាគច្រើនបំផុត ស្ថិតនៅក្នុងប្រទេសអ៊ីរ៉ង់តែម្តង ខណៈនៅអ៊ីរ៉ាក់គឺមនុស្សស្លាប់មានចំនួន ០៨នាក់ និងរងរបួស ប្រមាណជាង ២០០នាក់។ ក្រៅពីមនុស្សបាត់បង់ជីវិត អគារជាច្រើនខ្នង ក៏បានទទួលរងការបំផ្លិចបំផ្លាញក៏ដូចជាដួលរលំផងដែរ។

រំលឹកប្រវត្តិបន្តិចកាលពីឆ្នាំ២០០៣ តំបន់ទីក្រុងបុរាណ Bam ដែលស្ថិតនៅក្បែរតំបន់រងគ្រោះពេលនេះ ធ្លាប់រងគ្រោះរញ្ជួយដីដ៏សាហាវ ផ្តាច់ជីវិតមនុស្សដល់ទៅ ២៦,០០០នាក់ នៅក្នុងប្រទេសអ៊ីរ៉ង់ និងកាលពីខែសីហា ឆ្នាំ២០១២ គ្រោះរញ្ជួយដីបានកើតមាននៅខេត្តភាគខាងកើតប្រទេស អាហ្សែបៃហ្សង់ ស្លាប់មនុស្សជាង ៣០០នាក់៕