(អង់ការ៉ា)៖ បើទោះជា​មានការជំទាស់ពី​សមាជិកអង្គការ​ណាតូ និងការគំរាម​ដាក់ទណ្ឌកម្មពី​សំណាក់សហរដ្ឋអាមេរិក​ក៏ដោយ នៅទីបំផុតរដ្ឋាភិបាល​តួកគីបាន​ចុះហត្ថលេខា​ហើយលើ កិច្ចព្រមព្រៀង​ទិញប្រព័ន្ធមីស៊ីល​ការពារដែន​អាកាស S-400​ ពីរុស្ស៊ី។ នេះបើតាម​ការចេញផ្សាយ​ដោយ សារព័ត៌មាន Sputnik នៅព្រឹកថ្ងៃចន្ទ ទី១៣ ខែវិច្ឆិកា ឆ្នាំ២០១៧។

ជុំវិញកិច្ច​ព្រមព្រៀង​នេះដែរ នាយករដ្ឋមន្ត្រី​តួកគី លោក Binali Yildirim បាននិយាយថា ការសម្រេច​ចិត្តទិញ S-400 គឺដោយសារតែ​តួកគី បានបរាជ័យក្នុង​ការទិញ​ប្រព័ន្ធមីស៊ីល ស្រដៀងគ្នា​នេះពីបណ្ដាប្រទេសជា​សមាជិកអង្គការ​ណាតូ។ លោក Yildirim លើកឡើង​ដូច្នេះថា «យើងចង់បាន​ប្រព័ន្ធមីស៊ីល​ស្រដៀងគ្នានេះ ពីបណ្ដាប្រទេស​អង្គការ​ណាតូ ប៉ុន្តែ យើងបានបរាជ័យ​ ក្នុងការទទួល​បានការគំាទ្រ​ពី​សហរដ្ឋអាមេរិក... តែទោះ​ជាយ៉ាង​នេះក្ដី យើងចុះកិច្ច​ព្រមព្រៀង​ផ្នែក​វិស័យការពារជាតិ​ ជាមួយរុស្ស៊ី​មិនមែនមានន័យ​ថា យើងនឹង​ធ្វើឱ្យ ប៉ះពាល់ដល់​កតាព្វកិច្ច​របស់យើង ក្នុងនាមជាសមាជិកណាតូ​នោះទេ ប៉ុន្តែយើង​ចាំបាច់ត្រូវការ​វា គ្រាន់តែដើម្បីទប់ស្កាត់​ការគំរាមកំហែង​ណាមួយ ប្រឆាំងនឹងតួកគី​តែ​ប៉ុណ្ណោះ»។

គួរបញ្ជាក់ថា កាលពី​ថ្ងៃទី១២ ខែកញ្ញា ឆ្នាំ២០១៧ ទីក្រុងម៉ូស្គូ និងទីក្រុងអង់ការ៉ា បានឈាន​ដល់កិច្ចព្រមព្រៀង​ទិញ​ប្រព័ន្ធមីស៊ីល S-400​ ពីរុស្ស៊ី ហើយរហូត​ដល់ថ្ងៃទី២៩ ខែកញ្ញា មន្ត្រីរុស្ស៊ី​លោក Vladimir Kozhin បានទទួល​ស្គាល់ថា តួកគី​បានបង់ប្រាក់កក់ និងអាចទទួលបាន S-400 នៅឆ្នាំ២០១៩។ រុស្ស៊ី​ និងតួកគី បានចាប់ផ្ដើម​កិច្ចចរចាបញ្ជា​ទិញ​ប្រព័ន្ធ មីស៊ីលនេះ​កាលពី​ឆ្នាំមុន៕