(ម៉ានីល)៖ មនុស្សរាប់ពាន់នាក់ បាននាំគ្នាដង្ហែរឆ្ពោះទៅកាន់ស្ថានទូតអាមេរិកប្រចាំនៅរដ្ឋធានីម៉ានីល ដើម្បីធ្វើការតវ៉ាប្រឆាំងនឹងដំណើរមកដល់ នៃប្រធានាធិបតីអាមេរិក លោក ដូណាល់ ត្រាំ កាលពីល្ងាចមិញ សម្រាប់កិច្ចប្រជុំកំពូលលើកទី៣១ នៃសមាគមប្រជាជាតិអាស៊ីអាគ្នេយ៍ (អាស៊ាន) នៅប្រទេសហ្វីលីពីន ក៏ដូចជាគោលនយោបាយរបស់លោក។ នេះបើតាមការចេញផ្សាយដោយ សារព័ត៌មានរុស្ស៊ី Sputnik នៅព្រឹកថ្ងៃចន្ទ ទី១៣ ខែវិច្ឆិកា ឆ្នាំ២០១៧។
ក្រុមបាតុករដែលមានទាំង សិស្ស-និស្សិត, កសិករមកពីទីជនបទ, និងអ្នកបម្រើការក្រុមហ៊ុនជាដើមនោះ បានប្រមូលផ្តុំគ្នានៅលើផ្លូវ Kalaw Avenue មុនពេលដើរដង្ហែរឆ្ពោះទៅកាន់ស្ថានទូតអាមេរិក ដែលនៅចុងដងវិថីនេះ ក្បែរកំពង់ផែ Manila Bay។ ម៉្យាងវិញទៀត ទោះបីជាអាកាសធាតុក្តៅហួតហែងខ្លាំងយ៉ាងណាក្តី ក្រុមអ្នកតវ៉ាមានការតាំងចិត្តយ៉ាងមុតមាំ ក្នុងការបង្ហាញពីកំហឹងរបស់ពួកគេប្រឆាំងនឹងវត្តមានដ៏យូរអង្វែង របស់យោធាអាមេរិក នៅលើទឹកដីប្រទេសហ្វីលីពីន។
យោងតាម លោក Renato Reyes អ្នករៀបចំដឹកនាំបាតុកម្ម មនុស្សប្រមាណ ២,០០០-៣,០០០នាក់ បានចូលរួមក្នុងការប្រឆាំងតវ៉ានេះ។ នៅពេលដែលក្រុមបាតុករបានធ្វើដំណើរជិតដល់ស្ថានទូតអាមេរិកហើយនោះ កម្លាំងប៉ូលិសហ្វីលីពីន បានព្យាយាមរារាំងពួកគេ តាមរយៈការឈរបង្កើតជាខែល ហើយបិទផ្លូវរបស់ពួកគេ ដែលបានបណ្តាលឲ្យមានការប៉ះទង្គិចគ្នាឡើង។ ក្រោយហេតុការណ៍នេះ មនុស្សច្រើនជាង ២០នាក់ បានរងរបួស ខណៈសកម្មជនម្នាក់ត្រូវបានឃាត់ខ្លួន។ ស្របពេលដែលកិច្ចប្រជុំសំខាន់ៗ រវាងបណ្តាមេដឹកនាំពិភពលោក នឹងចាប់ផ្តើមប្រព្រឹត្តទៅនាព្រឹកនេះនោះ លោក Reyes បានបញ្ជាក់ថា នឹងបន្តដឹកនាំបាតុកម្មថែមទៀត។
គួរជម្រាបថា ដើម្បីធានាសន្តិសុខសុវត្ថិភាពរបស់មេដឹកនាំពិភពលោកនានា ហើយបញ្ចៀសការរំខានផ្សេងៗ ដែលអាចកើតមានឡើង ក្នុងអំឡុងពេលកិច្ចប្រជុំអាស៊ាននោះ ទីបញ្ជាការប៉ូលិសជាតិហ្វីលីពីន បានដាក់ពង្រាយកម្លាំងជាង ៦០,០០០នាក់ នៅតាមដងវិថីទូទាំងរដ្ឋធានីម៉ានីល និងទីក្រុង Angeles ជាទីដែលកិច្ចប្រជុំត្រូវប្រារព្ធឡើង៕
