(ស្តក់ហូម)៖ អតីតទីប្រឹក្សា​សន្តិសុខជាតិ​អាមេរិក លោក Michael Flynn ត្រូវបានស៊ើបអង្កេត​ដោយរដ្ឋអាជ្ញា​ពិសេស លោក Robert Mueller ពីបទទទួល​លុយរាប់សិបលានដុល្លារ ដើម្បីបណ្តេញបុព្វជិត​មូស្លីមម្នាក់ ដែលរស់នៅរដ្ធ Pennsylvania។ នេះ​បើ​តាម​សេចក្តី​រាយ​ការណ៍​​របស់​​កាសែត The Wall Street Journal ដកស្រង់​ដោយ​វែបសាយ Stockholm Center For Freedom នៅព្រឹក​ថ្ងៃចន្ទ ទី១៣ ខែវិច្ឆិកា ឆ្នាំ២០១៧។.

លោក Michael Flynn និងកូនប្រុសគឺ លោក Michael Flynn Jr. បានទទួល​ប្រាក់​ចំនួន ១៥លាន​ដុល្លារ​ ជាថ្នូរនឹង​ការ​ប្រគល់​ខ្លួន​បុព្វ​​ជិត​​មូស្លីម ​លោក Fethullah Gülen ទៅអោយ​រដ្ឋាភិបាល​តួកគីវិញ។ នេះ​បើ​តាម​​ការអះអាង​ពីប្រភព​​ដែល​បាន​ដឹង​ពី​ការ​សន្ទ​នា​​រវាង​ លោក Flynn និងអ្នកតំណា​របស់តួកគី​នៅឯក្លឹបកម្សាន្ត​លេខ ២១ ក្នុងទីក្រុង​ញូយ៉ក។

ការ​ពិភាក្សានោះ បាននិយាយអំពី​ការដឹកជញ្ចូន លោក Gülen តាមរយៈយន្តហោះ​ឯកជន​ទៅកាន់ពន្ធនាគារ​មួយ ដែលនៅ​លើ​កោះ Imral ជាកន្លែងដែល​គេឃុំឃាំង​ខ្លួន លោក Abdullah Ocalan ជាមេដឹកនាំ​របស់​គណបក្សពលករ​ឃើដ PKK។ ការសែត WSJ ក៏​បាន​រាយ​ការណ៍​​ផង​​ដែរ​ថា «មនុស្សម្នាក់​ដែលដឹងពី​ការពិភាក្សា​នៃរឿង លោក Gulen នោះបាន​និយាយថា លោក Flynn ក៏បានគ្រោង​​ប្រើ​​ឥទ្ធិ​​ពល​​​របស់​លោក​​នៅសេតវិមាន ដើម្បីបន្ត​ធ្វើបត្យាប័ន លោក Gulen ដោយស្រប​ច្បាប់​ផងដែរ»។

គួរជម្រាបថា លោក Michael Flynn ត្រូវបានប្រធានាធិបតីអាមេរិក លោក Donald Trump បណ្តេញចេញពី​ដំណែងកាលពី​ខែកុម្ភៈ​កន្លងទៅនេះ បន្ទាប់ពីមន្ត្រី​សហរដ្ឋអាមេរិក​លើក​ឡើងថា លោក Flynn ធ្លាប់បានលួច​មាន​ទំនាក់​ទំនង ជាមួយអគ្គរដ្ឋទូតរុស្ស៊ី​កាល​ពី​​ខែ​ធ្នូ​ឆ្នាំមុន៕