(ឌូបៃ)៖ ក្រុមហ៊ុនអាកាសចរណ៍ Emirates បានឈានដល់កិច្ចព្រមព្រៀងមួយបញ្ជាទិញយន្ដហោះ Boeing Dreamliner 787​ចំនួន ៤០គ្រឿង ក្នុងតម្លៃសរុបជាង១៥.១ពាន់លាន ដុល្លារ។ នេះបើតាមCEO ក្រុមហ៊ុន Emirates លោក Sheik Ahmed bin Saeed Al Maktoum ដកស្រង់ដោយទីភ្នាក់ងារសារព័ត៌មានបារាំង AFP នៅថ្ងៃអាទិត្យ ទី១២ ខែវិច្ឆិកា ឆ្នាំ២០១៧។

លោក ​Saeed Al Maktoum បានលើកឡើងដូច្នេះថា៖«ការបញ្ជាទិញរបស់ក្រុមហ៊ុន Emirates នៅថ្ងៃនេះ នឹងចាប់ផ្ដើមប្រគល់នៅឆ្នាំ២០២២ ដែលនឹងជួយដល់យើងក្នុងការរក្សា ប្រសិទ្ធិភាពនៃវិស័យហោះហើរ ក៏ដូចជាបង្កើនបណ្ដាញហោះហើររបស់យើងនៅពេលអនាគត់ សំដៅសម្រេចឱ្យបាននូវវិស័យហោះឈានមុខគេនៅក្នុងប្រទេសអេមីរ៉ាតអារ៉ាប់រួម និងនៅក្នុងតំបន់ទាំងមូល»។

គួរបញ្ជាក់ថា ក្រុមហ៊ុនអាកាសចរណ៍ Emirates គឺជាអតិថិជនដ៏ធំក្នុងពិភពលោកសម្រាប់ យន្ដហោះBoeing 777 ដែលមានយន្ដហោះ១៦៥គ្រឿង និង១៦៤គ្រឿងផ្សេងទៀត កំពុងស្ថិតនៅក្រោមការបញ្ជាទិញ៕