(វៀតណាម)៖ ស្លាកសញ្ញានៃកិច្ចប្រជុំ APEC នៅវៀតណាមនាឆ្នាំនេះ បង្ហាញពីរស្មីព្រះអាទិត្យចំនួន ២១ ធ្វើចលនាក្នុងលក្ខណៈរង្វិលជុំ ដែលតំណាងឲ្យស្មារតីនៃកិច្ចសហប្រតិបត្តិការ ក្នុងចំណោមសមាជិកសេដ្ឋកិច្ចនៃវេទិកានេះ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសៅរ៍ ទី១១ ខែវិច្ឆិកា ឆ្នាំ២០១៧។
វេទិកា APEC ត្រូវបានបង្កើតឡើងកាលពីឆ្នាំ១៩៨៩ ដើម្បីជំរុញការធ្វើពាណិជ្ជកម្មដោយសេរី និងសមាហរណកម្មព្រមទាំងសហប្រតិបត្តិការសេដ្ឋកិច្ច នៅក្នុងចំណោមប្រទេសទាំងអស់ នៅព័ទ្ធជុំវិញមហាសមុទ្រប៉ាស៊ីហ្វិក ដែលជាសមាជិក ខណៈកិច្ចប្រជុំ APEC នាឆ្នាំនេះ ត្រូវបានប្រារព្ធឡើងក្រោមប្រធានបទ «ការបង្កើតថាមវន្តថ្មី និងអនាគតរួម»។
ដើម្បីធ្វើយ៉ាងដូច្នោះបាន ប្រទេសសមាជិកទាំងអស់ ដែលមានចំនួនប្រជាជនសរុប ០៣ពាន់លាននាក់ និង GDP ៦០ភាគរយនៃ GDP ពិភពលោកទាំងមូលនោះ ចាំបាច់ត្រូវតែប្រកាន់ខ្ជាប់នូវស្មារតីសហការគ្នា ដែលត្រូវបានបង្កប់យ៉ាងជ្រៅ នៅក្នុងអត្តសញ្ញាណនៃក្រុមប្រទេសសេដ្ឋកិច្ចមួយនេះ។
ក្នុងរយៈពេលជាច្រើនឆ្នាំកន្លងមក សមាជិក APEC បានរួមគ្នាកាត់បន្ថយរនាំងពាណិជ្ជកម្មរវាងពួកគេ, ធ្វើសុខដុមនីយកម្មស្តង់ដានិងបទបញ្ញតិនានា, និងបង្កើតយុទ្ធសាស្រ្តដែលអនុញ្ញាតឲ្យមានការចល័តទំនិញឆ្លងដែន ប្រកបដោយភាពរលូនជាងមុន។ សមាជិក APEC ក៏បានធ្វើការជាមួយគ្នា ដើម្បីសម្រួលដល់ប្រតិបត្តិការអាជីវកម្ម នៅក្នុងតំបន់ផងដែរ ដើម្បីផ្តល់ភាពងាយស្រួល ក្នុងការបើកក្រុមហ៊ុននៅក្នុងតំបន់។
ដោយឡែក ក្នុងយុគសម័យថ្មីនេះ សមាជិកសេដ្ឋកិច្ចទាំងនេះ គួរតែបន្តធ្វើអ្វីៗដោយឈរលើគោលការណ៍ នៃការរួមបញ្ចូលគ្នា និងការទទួលប្រយោជន៍រួម ព្រមទាំងប្រឈមមុខដោះស្រាយតម្រូវការពិសេស នៃសមាជិកនៅក្នុងចំណោមពួកគេ ដែលមានសេដ្ឋកិច្ចកំពុងអភិវឌ្ឍន៍ និងបង្កើតឲ្យមានបរិយាកាស ដែលអំណោយផលដល់ពួកគេទាំងនោះ ក្នុងការចូលរួមកិច្ចសហប្រតិបត្តិការក្នុងតំបន់ជាដើម។
គួរបញ្ជាក់ថា ម៉្យាងវិញទៀត APEC គួរតែបន្តជំរុញការតភ្ជាប់កាន់តែទូលំទូលាយជាងមុន ដើម្បីធ្វើជាឧបករណ៍ដ៏មានប្រសិទ្ធភាពមួយ ក្នុងការលុបបំបាត់ឧបសគ្គនៃការអភិវឌ្ឍ ហើយសម្រេចបាននូវកំណើន ក៏ដូចជាភាពរីកចម្រើនរួមគ្នា៕
