(អ៊ីស្តង់ប៊ុល)៖ ក្រៅពីរដ្ឋធានីអង់ការ៉ា នាថ្ងៃសុក្រនេះប៉ូលិសតួកគី បានបន្តបើកប្រតិបត្តិការបោសសម្អាតបណ្តាញ ISIS នៅទីក្រុងអ៊ីស្តង់ប៊ុល ព្រមទាំងខេត្តអាដាណា ភាគខាងត្បូងប្រទេស ដោយលើកនេះជនសង្ស័យចំនួន ៩៣នាក់ថែមទៀត ត្រូវបានចាប់ឃាត់ខ្លួន។ នេះបើតាមសេចក្តីរាយការណ៍ របស់ប្រព័ន្ធផ្សព្វផ្សាយក្នុងស្រុកតួកគី ដកស្រង់ដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃសុក្រ ទី១០ ខែវិច្ឆិកា ឆ្នាំ២០១៧។
បើតាមការគូសបញ្ជាក់របស់ទីភ្នាក់ងារព័ត៌មានរដ្ឋតួកគី Anadolu ជនសង្ស័យទាំងអស់ខាងលើ សុទ្ធតែជាជនបរទេស ដោយ ៨២នាក់ ក្នុងចំណោមនោះត្រូវចាប់ខ្លួនបាន ក្នុងអំឡុងពេលប្រតិបត្តិការព្រមៗគ្នា ធ្វើឡើងនៅតាមទីតាំងចំនួន ១៤ទីតាំង ក្នុងទីក្រុងអ៊ីស្តង់ប៊ុល ខណៈជនជាតិស៊ីរី ១១នាក់ ត្រូវបានឃាត់ខ្លួននៅខេត្ត Adana។
គួរជម្រាបថា កាលពីម្សិលមិញកងកម្លាំងសមត្ថកិច្ចតួកគី បានបើកប្រតិបត្តិការក្តៅគគុក ចាប់ឃាត់ខ្លួនបានជនសង្ស័យជាបណ្តាញក្រុម ISIS សរុបចំនួន ១០១នាក់ នៅក្នុងរដ្ឋធានីអង់ការ៉ា។ លើសពីនេះទៀត កាលពីចន្លោះថ្ងៃទី២២ ខែតុលា ដល់ថ្ងៃទី០១ ខែវិច្ឆិកាថ្មីៗនេះ អាជ្ញាធរតួកគី ក៏បានបើកប្រតិបត្តិការប្រឆាំង ISIS នៅតាមបណ្តាខេត្តចំនួន ២៥ ទូទាំងប្រទេសផងដែរ ដោយកាលនោះកម្លាំងប៉ូលិស បានធ្វើការឃាត់ខ្លួនអ្នកប្រយុទ្ធជាក្រុមភេរវករនេះចំនួន ២៨៣នាក់ បូករួមនិងគ្រឿងផ្ទុះ ៦៦គ្រឿង ព្រមទាំងអាវុធមួយចំនួនទៀត៕
