(ប៉េកាំង)៖ ស្ថិតនៅក្នុងកិច្ចព្រមព្រៀង​ពាណិជ្ជកម្មសរុប សម្រាប់ចិន និងសហរដ្ឋអាមេរិក ចំនួន ២៥៣ពាន់លានដុល្លារ នៅក្នុងដំណើរ​ទស្សនកិច្ចរបស់ ប្រធានាធិបតី​លោក ដូណាល់ ត្រាំ មកកាន់ទីក្រុង​ប៉េកាំងនោះ ៣៧ពាន់លានដុល្លារ​ក្នុងចំណោមនោះ គឺជាកិច្ចព្រមព្រៀង​ដែលចិន​បញ្ជាទិញ​យន្តហោះ Boeing ចំនួន ៣០០គ្រឿង ពីសហរដ្ឋអាមេរិក ក្នុងតម្លៃ ៣៧ពាន់លានដុល្លារ។ នេះបើតាមការ​ចេញផ្សាយដោយ សារព័ត៌មានចិន ស៊ីនហួរ នារសៀល​ថ្ងៃព្រហស្បតិ៍ ទី០៩ ខែវិច្ឆិកា ឆ្នាំ២០១៧។

សម្រាប់កិច្ចព្រមព្រៀង​ដ៏ធំខាងលើនេះ ត្រូវបានចូលរួមចុះហត្ថលេខា​ដោយ លោក Kevin McAllister ប្រធាន និងជានាយកប្រតិបត្តិរបស់ក្រុមហ៊ុនយក្ស Boeing ផ្ទាល់ ក្រោមអធិបតីភាពរបស់ ប្រធានាធិបតីចិន លោក ស៊ី ជិនពីង និងប្រធានាធិបតីសហរដ្ឋ​អាមេរិក លោក ដូណាល់ ត្រាំ ក្នុងតម្លៃ ៣៧ពាន់លានដុល្លារ។ ក្នុងឱកាសនោះ ក្រុមហ៊ុន Boeing របស់អាមេរិក​មួយនេះ ក៏បាន​សន្យា​ផងដែរថា នឹងប្រឹងប្រែង​បម្រើការងារ ដើម្បីបំពេញ​នូវផលប្រយោជន៍​ទៅវិញទៅមក ក្នុងន័យបង្កើន​ការគាំទ្រលើ​ទីផ្សារអាកាសចរណ៍​របស់ខ្លួន។

យោងតាមសារព័ត៌មានដដែល ក្នុងរយៈពេល ០២ថ្ងៃមកនេះ កិច្ចព្រមព្រៀង​​ពាណិជ្ជកម្ម​សរុប ២៥៣.៥ពាន់លានដុល្លារ ត្រូវបាន​ព្រមព្រៀងគ្នា​រវាងលោក ស៊ី និងលោក ត្រាំ ហើយដែល​នេះ គឺជា​កិច្ចព្រមព្រៀងជាប់កំណត់ត្រាថ្មីមួយ​ សម្រាប់​ទំនាក់ទំនង​ពាណិជ្ជកម្ម រវាង​សហរដ្ឋអាមេរិក និងចិន។ បន្ថែមពីលើនេះ ថ្លែងនៅក្នុងកិច្ច​សន្ទនាផ្លូវការ​​ជាមួយ លោក ដូណាល់ ត្រាំ លោក ស៊ី ជិនពីង បានថ្លែងពាក្យ​ស្វាគមន៍​យ៉ាងកក់​ក្តៅថា «ទំនាក់ទំនង​រវាង​ប្រទេស​ចិន និងសហរដ្ឋអាមេរិក កំពុងតែចាប់ផ្តើម​​ពីចំណុច​ជាប្រវត្តិសាស្ត្រ​ថ្មីមួយ» ខណៈប្រទេស​ទំាងពីរ នៅមានបញ្ហា​ខ្វែងគំនិតគ្នាជា​ច្រើនត្រូវ​ដោះស្រាយ។

គួរបញ្ជាក់ថា ក្រៅតែពី​ទំនាក់ទំនង​ពាណិជ្ជកម្ម សំណុំរឿងនុយក្លេអ៊ែរ​កូរ៉េខាងជើង នៅតែស្ថិត​ក្នុងប្រធានប​ទសំខាន់​របស់ លោក ត្រាំ ដោយ​លោកផ្ទាល់​បានប្រាប់ប្រធានាធិបតីចិន​ថា លោកជឿជាក់ថា ដំណោះស្រាយមួយ​នឹងកើតឡើង​សម្រាប់បញ្ហា​កូរ៉េខាងជើង៕