(ប៉េកាំង)៖ ប្រធានាធិបតីអាមេរិក លោក ដូណាល់ ត្រាំ នឹងស្នើឱ្យចិនកាត់ផ្ដាច់ទំនាក់ទំនងហិរញ្ញវត្ថុជាមួយកូរ៉េខាងជើង ក៏ដូចជាគោរពឱ្យមានខ្ជាប់ខ្ជួន ចំពោះដំណោះស្រាយដាក់ទណ្ឌកម្ម នៃក្រុមប្រឹក្សាសន្តិសុខអង្គការសហប្រជាជជាតិ នៅអំឡុងពេលលោកជួបពិភាក្សាការងារ ជាមួយប្រធានាធិបតីចិន លោក ស៊ី ជិនពីង។ នេះបើតាមមន្ត្រីជាន់ខ្ពស់សេតវិមានម្នាក់ ដកស្រង់ដោយទីភ្នាក់ងារសារព័ត៌មាន Reuters នៅរសៀលថ្ងៃពុធ ទី០៨ ខែវិច្ឆិកា ឆ្នាំ២០១៧។
លោក ដូណាល់ ត្រាំ បានធ្វើដំណើរទៅដល់ទីក្រុងប៉េកាំងហើយ នៅរសៀលថ្ងៃពុធនេះ សម្រាប់ដំណើរទស្សនកិច្ច ០២យប់ បន្ទាប់ពីបញ្ចប់ទស្សនកិច្ចនៅកូរ៉េខាងត្បូង ជាទីដែលលោក បានពិភាក្សាពីបញ្ហាកូរ៉េខាងជើងជាមួយថ្នាក់ដឹកនាំកូរ៉េខាងត្បូង។ ប៉ុន្តែទន្ទឹមគ្នាមន្ត្រីជាន់ខ្ពស់សេតវិមានម្នាក់ បានប្រាប់អ្នកសារព័ត៌មានលើយន្ដហោះ Air Force One ថា លោក ត្រាំ មិនទាន់ចិត្តនៅឡើយទេថា នឹងប្រកាសដាក់ឈ្មោះកូរ៉េខាងជើង ជារដ្ឋគំាទ្រភេរវករ ឬក៏យ៉ាងណានោះ ក្រោយបញ្ចប់ទស្សនកិច្ចនៅអាស៊ី។
គួរបញ្ជាក់ថា ក្រោយកូរ៉េខាងជើងបំផ្ទុះក្បាលគ្រាប់នុយក្លេអែរជាលើកទី០៦ កាលពីខែកញ្ញា ទីក្រុងប៉េកាំង បានសម្រេចចិត្តដាក់ទណ្ឌកម្មជាច្រើន ប្រឆាំងនឹងកូរ៉េខាងជើង។ ប៉ុន្តែ អ្នកជំនាញខ្លះយល់ថា បើទោះជាទីក្រុងប៉េកាំងធ្វើបែបនេះក៏ដោយ ក៏មិនមែនមានន័យថា ចិនព្រមលែងដៃកូរ៉េខាងជើង ឱ្យសហរដ្ឋអាមេរិកធ្វើអ្វីតាមចិត្តនោះដែរ ហើយម្យ៉ាងវិញទៀត បើសិនជាចិនចង់ទប់ទល់នឹង ការពង្រីកឥទ្ធិពលយោធាអាមេរិកនៅក្នុងតំបន់ ទីក្រុងប៉េកាំងនៅតែត្រូវការកូរ៉េខាងជើងជាដាច់ខាត៕
.
