(សេអ៊ូល)៖ ប្រធានាធិបតីអាមេរិក លោក ដូណាល់ ត្រាំ នាថ្ងៃអង្គារនេះបាននិយាយថា លោកនឹងបន្តជំរុញឲ្យកូរ៉េខាងត្បូង ព្រមទាំងប្រជាជាតិដទៃៗទៀតលើសកលលោក ចូលរួមដាក់សម្ពាធទៅលើកូរ៉េខាងជើង ដើម្បីឲ្យប្រទេសមួយនេះ បោះបង់ចោលអាវុធកម្មវីធីនុយក្លេអ៊ែររបស់ខ្លួន ដោយលើកឡើងថា វត្តមានរបស់កូរ៉េខាងជើង គឺពុំអាចទទួលយកបានដាច់ខាត។ នេះបើតាមការចេញផ្សាយដោយសារព័ត៌មាន USA Today នៅល្ងាចថ្ងៃអង្គារ ទី០៧ ខែវិច្ឆិកា ឆ្នាំ២០១៧។
ថ្លែងក្នុងសន្និសីទសារព័ត៌មានមួយ ក្រោយបានចូលរួមប្រជុំជាមួយ ប្រធានាធិបតីកូរ៉េខាងត្បូង លោក មូន ជែអ៊ីន នៅឯវិមាន Blue House លោក ដូណាល់ ត្រាំ បាននិយាយថា «កូរ៉េខាងជើង គឺជាការគំរាមកំហែងរបស់ពិភពលោក ដែលទាមទារឲ្យមានចំណាត់ការរួមពីអន្តរជាតិ»។
ជាមួយគ្នានេះ លោកប្រធានាធិបតីអាមេរិក ក៏បានគូសបញ្ជាក់ដែរថា រូបលោកមិនរារែកក្នុងការធ្វើសកម្មភាពយោធា ប្រឆាំងនឹងកូរ៉េខាងជើងនោះឡើយ ប្រសិនបើវាជាការចាំបាច់ពុំអាចជៀសផុតបាន ក៏ប៉ុន្តែលោក ត្រាំ បានប្រាប់ថា លោកមិនចង់ប្រើប្រាស់កម្លាំងបាយ ដាក់របបដឹកនាំទីក្រុងព្យុងយ៉ាងទេ ហើយសង្ឃឹមថា វិបត្តិនៅឧបទ្វីបកូរ៉េនេះ នឹងអាចត្រូវដោះស្រាយបានដោយសន្តិវិធី។
នាឱកាសនោះ ប្រធានាធិបតីកូរ៉េខាងត្បូង លោក មូន ជែអ៊ីន បានថ្លែងថា ខណៈនេះជាពេលសម្រាប់ផ្តោតការយកចិត្តទុកដាក់សំខាន់ទៅលើការទណ្ឌកម្ម ព្រមទាំងសម្ពាធប្រឆាំងនឹងកូរ៉េខាងជើង។ លោក មូន បានបន្តថា រូបលោកនិងលោក ត្រាំ បានគូសបញ្ជាក់ជំហររវាងគ្នា និងគ្នាថា នឹងធ្វើយ៉ាងណាបញ្ចប់បញ្ហានុយក្លេអ៊ែរកូរ៉េខាងជើង ដោយសន្តិវិធី។
គួរបញ្ជាក់ថា លោក ដូណាល់ ត្រាំ បានធ្វើដំណើរមកដល់ប្រទេសកូរ៉េខាងត្បូង នាថ្ងៃអង្គារនេះ ខណៈក្រុមបាតុករកូរ៉េខាងត្បូងរាប់រយនាក់បានប្រមូលផ្ដុំគ្នា នៅកណ្ដាលទីក្រុងសេអ៊ូល ដើម្បីសម្ដែងការប្រឆាំងជំទាស់របស់ពួកគេ ទៅនឹងការបំពេញទស្សនកិច្ចផ្លូវរដ្ឋ រយៈពេល ០២ថ្ងៃ របស់ប្រធានាធិបតីអាមេរិករូបនេះ៕
