(ម៉ូស្គូ)៖ ប្រធានាធិបតីអាមេរិក លោក ដូណាល់ ត្រាំ បានសម្ដែងការគាំទ្រដល់ប្រតិបត្តិការបោសសំអាត អំពើពុករលួយដឹកនាំដោយរាជទាយាទអារ៉ាប៊ីសាអូឌីត គឺព្រះអង្គម្ចាស់ Mohammad bin Salman ប្រឆាំងនឹងព្រះអង្គម្ចាស់ យោធា និងអ្នកជំនួញមានឥទ្ធិពលមួយចំនួននៅក្នុងប្រទេស។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃអង្គារ ទី០៧ ខែវិច្ឆិកា ឆ្នាំ២០១៧។
កាលពីចុងសប្ដាហ៍កន្លងទៅ ព្រះអង្គម្ចាស់ ១១អង្គ រដ្ឋមន្ត្រី ០៤រូប និងអ្នកជំនួញដ៏មានឥទ្ធិពលមួយចំនួន ដូចជាព្រះអង្គម្ចាស់ Alwaleed bin Talal (ជាមហាសេដ្ឋី) ត្រូវបានប៉ូលិស អារ៉ាប៊ីសាអូឌីចាប់ឃុំខ្លួនបណ្ដោះអាសន្ន ក្រោមក្របខណ្ឌនៃការស៊ើបអង្កេតពាក់ព័ន្ធនឹងអំពើពុករលួយ និងលាងលុយកង្វក់។ ដោយឡែក ជុំវិញប្រតិបត្តិការនេះដែរប្រធានាធិបតីអាមេរិក លោក ដូណាល់ ត្រាំ បានសម្ដែងការគាំទ្រដល់ការស៊ើបអង្កេតដឹកនាំដោយ ព្រះអង្គម្ចាស់ Mohammad bin Salman។
លោក ត្រាំ បានសរសេរនៅលើ Twitter ដូច្នេះថា «ខ្ញុំទុកចិត្តលើស្ដេច Salman និងព្រះរាជទាយាទអារ៉ាប៊ីសាអូឌីត... ពួកគេដឹងយ៉ាងច្បាស់ពីអ្វីដែលពួកគេកំពុងធ្វើ ខណៈមនុស្សចំនួន ដែលពួកគេកំពុងបោសសំអាត បានទាញយកប្រយោជន៍ពីប្រទេសពួកគេ អស់រយៈពេលជាច្រើនឆ្នាំមកហើយ»។
គួរបញ្ជាក់ថា ធនាគារអារ៉ាប៊ីសាអូឌីតជាច្រើនបានចាប់ផ្ដើមបង្កក ហើយកាលពីថ្ងៃចន្ទ នូវគណនីរបស់ជនសង្ស័យ ដែលត្រូវបានចាប់ខ្លួន នៅក្នុងយុទ្ធនាការប្រឆាំងអំពើពុករលួយ ដឹកនាំដោយព្រះអង្គម្ចាស់ រាជទាយាទ Mohammed bin Salman ក៏ប៉ុន្តែក្រុមអ្នកជំនាញខ្លះ ប្រតិបត្តិការនេះធ្វើឡើងក្នុងគោលបំណង ពង្រឹងអំណាចព្រះបុត្រាស្នងរាជ្យ៕
