(ញូដេលី)៖ គ្រាប់បែកកំណត់ទីតាំង ដែលមានទម្ងន់ស្រាល តែមានកម្លាំងខ្លាំង និងផលិតនៅក្នុងស្រុក ត្រូវបានកងទ័ពឥណ្ឌា ធ្វើតេស្តជាលើកដំបូង ព្រមទាំងទទួលបានជោគជ័យ ស្ថិតនៅរដ្ឋ Odisha ភាគខាងកើតប្រទេស។ នេះបើតាមការផ្សាយរបស់សារព័ត៌មាន ស៊ីនហួរ ដកស្រង់សម្តីពីមន្ត្រីក្រសួងការពារជាតិឥណ្ឌា នារសៀលថ្ងៃសៅរ៍ ទី០៤ ខែវិច្ឆិកា ឆ្នាំ២០១៧។
សេចក្តីរាយការណ៍បានបន្តទៀតថា ការធ្វើតេស្តត្រូវបានធ្វើឡើង ដោយកងទ័ពអាកាសឥណ្ឌា តាមរយៈការទម្លាក់គ្រាប់បែកពីលើយន្តហោះ ទៅលើទីតាំងស្ថិតនៅតាមបណ្តោយឆ្នេរសមុទ្រ Chandipur នៃរដ្ឋ Odisha ដោយវាជាប្រភេទគ្រាប់បែកកំណត់ទីតាំង ជាមួយនឹងការស្វែងរកចំណុចត្រឹមត្រូវ ព្រមទាំងកម្លាំងផ្ទុះខ្លាំងក្លា។
ក្រសួងការពារជាតិឥណ្ឌា បានបញ្ជាក់យ៉ាងដូច្នេះថា «យើងបានធ្វើតេស្តសរុបបីលើក ជាមួយនិងស្ថានការណ៍ និងរយៈចម្ងាយខុសៗគ្នា ហើយគ្រប់លើកគឺទទួលបានជោគជ័យ»។ គ្រាប់បែកប្រភេទថ្មី ជាផលិតផលក្នុងស្រុកនេះ ត្រូវបានអភិវឌ្ឍន៍ និងបង្កើតចេញជារូបរាងឡើងដោយមជ្ឈមណ្ឌលស្រាវជ្រាវ Imarat (RCI) និងអង្គការស្រាវជ្រាវ និងអភិវឌ្ឍន៍វិស័យការពារជាតិឥណ្ឌា (DRDO) សហការណ៍ជាមួយនិងមន្ទីរពិសោធន៍នានា របស់កងទ័ពអាកាស៕
