(ព្យុងយ៉ាង)៖ ប្រទេសកូរ៉េខាងជើង បានសម្តែងការរិះគន់ធ្ងន់ៗសាជាថ្មី ចំពោះសហរដ្ឋអាមេរិកដែលកំពុងតែបញ្ឆេះភាពតានតឹងនៅឧបទ្វីបកូរ៉េ តាមរយៈការបញ្ជូនយន្តហោះទម្លាក់គ្រាប់បែកនុយក្លេអ៊ែរដ៏មានអានុភាព B-1B មកក្នុងតំបន់។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃសុក្រ ទី០៣ ខែវិច្ឆិកា ឆ្នាំ២០១៧។
នៅថ្ងៃព្រហស្បតិ៍សប្តាហ៍នេះ យន្តហោះទម្លាក់គ្រាប់បែកយុទ្ធសាស្ត្រ B-1B ដែលត្រូវបានចាត់ទុកជាសព្វាវុធដ៏មានអានុភាពបំផុត ដែលអាចទម្លាក់គ្រាប់បែកនុយក្លេអ៊ែរនោះ ត្រូវបានបញ្ចូនពីមូលដ្ឋានទ័ពអាកាស Anderson នៅលើកោះ Guam នៃមហាសមុទ្រប៉ាស៊ីហ្វិកខាងលិច។ ប្រការនេះត្រូវបានកូរ៉េខាងជើងអះអាងថា សហរដ្ឋអាមេរិកកំពុងតែបង្កឲ្យស្ថានការណ៍កាន់តែតានតឹង និងនាំទៅរកការផ្ទុះសង្គ្រាមនុយក្លេអ៊ែរជាមិនខាន។
ទោះបីជាបែបនេះក្តី សារព័ត៌មានរដ្ឋកូរ៉េខាងជើង KCNA បានចេញផ្សាយថា «ដើម្បីត្រៀមធ្វើសមយុទ្ធទម្លាក់គ្រាប់បែក ដែលកូរ៉េខាងត្បូង និងអាមេរិកកំពុងតែត្រៀមធ្វើការវាយប្រហារទៅលើទីតាំងនានានៅកូរ៉េខាងជើង»។ សារព័ត៌មានរដ្ឋកូរ៉េខាងជើង ក៏បានបន្ថែមទៀតដែរថា នាវាមុជទឹកនុយក្លេអ៊ែរ Ronald Reagan ក៏នៅតែបន្តស្ថិតក្នុងដែនទឹកឧបទ្វីបកូរ៉េដដែល រួមជាមួយនឹងនាវាដឹកយន្តហោះចម្បាំងពីរគ្រឿងទៀត៕
