(អាមេរិក)៖ បន្ទាប់ពីបានហៅភេរវករថាជាសត្វមួយក្បាល ដែលបានវាយប្រហារដោយបើករថយន្ត បំបុកមនុស្សស្លាប់ ០៨នាក់ និងរបួសមួយចំនួនទៀត នៅទីក្រុងញូយ៉កកាលពីថ្ងៃពុធនោះ លោក ដូណាល់ ត្រាំ បានប្រកូកប្រកាសបន្ថែមទៀតដោយទាមទារឲ្យមានការប្រហារជីវិតជននោះចោលតែម្តង ដើម្បីជាការព្រមានចំពោះទង្វើដ៏អាក្រក់ និងគួរឲ្យស្អប់ខ្ពើមបំផុតនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Sputnik នារសៀលថ្ងៃព្រហស្បតិ៍ ទី០២ ខែវិច្ឆិកា ឆ្នាំ២០១៧។
សម្រាប់ជនដែលអាមេរិកអះអាងថា ជាភេរវករឈ្មោះ Sayfullo Saipov វ័យ ២៩ឆ្នាំ ត្រូវបានចោទប្រកាន់ជាលើកដំបូងចំពោះការផ្តល់សម្ភារៈ និងធនធានគាំទ្រក្រុម ISIS និងបទល្មើសទីពីរ គឺការបើករថយន្តបំបុកមនុស្ស ដែលបានបណ្តាលឲ្យស្លាប់ចំនួន០៨នាក់ នៅទីក្រុងញូយ៉ក សហរដ្ឋអាមេរិក។ អគ្គរដ្ឋអាជ្ញា Joon Kim បានពន្យល់ថា «គ្រាន់តែបទឧក្រិដ្ឋទី១ នេះក៏វាគ្រប់គ្រាន់នឹងឲ្យ Saipov ទទួលទោសប្រហារជីវិតបានដែរ។ ដោយឡែកសម្រាប់បទឧក្រិដ្ឋទីពីរវិញនោះក៏មិនខុសគ្នានោះដែរ»។
លោក ត្រាំ បានសរសេរបង្ហោះ នៅលើបណ្តាញ Twitter របស់លោក យ៉ាងដូច្នេះថា «ជនបង្កអំពើភេរវកម្មនៅញូវយ៉ក បានសប្បាយរីករាយ ដោយសុំឲ្យដោតទង់ជ័យ ISIS ក្នុងបន្ទប់មន្ទីរពេទ្យ ដែលគេកំពុងស្ថិតនៅទៀត។ រូបគេបានសម្លាប់មនុស្ស០៨នាក់ និងបង្ករបួសធ្ងន់ដល់មនុស្ស១២នាក់។ ដូច្នេះគេគួរតែទទួលទោសប្រហារជីវិត...!»។ មុននៃការថ្លែងបែបនេះ លោក ដូណាល់ ត្រាំ ក៏បានស្នើទៅសភា ដើម្បីលុបចោលការអនុញ្ញាតឲ្យមាន ការលេងឆ្នោតពិសេស ឬ Green card lottery ដែលកន្លងមក តែងតែបានអនុញ្ញាតឲ្យជនបរទេសដែលឈ្នះមានសិទ្ធិមករស់នៅក្នុងសហរដ្ឋអាមេរិកនោះ៕
.
