(រ៉ង់ហ្គូន)៖ ទីបំផុតលោកស្រី អោងសាង ស៊ូជី ប្រធានក្រុមប្រឹក្សារដ្ឋមីយ៉ាន់ម៉ា បានសម្រេចទៅបំពេញទស្សនកិច្ចជាលើកដំបូង នៅក្នុងរដ្ឋរ៉ាឃីន ភាគពាយ័ព្យប្រទេសដែលកំពុងតែគ្របដណ្តប់ ដោយបញ្ហាជនជាតិរ៉ូហ៊ីងយ៉ាហើយ បន្ទាប់ពីរងការដាក់សម្ពាធកាន់តែធ្ងន់ ពីសហគមន៍អន្តរជាតិ។ នេះបើតាមការចេញផ្សាយដោយ បណ្តាញព័ត៌មានទាន់ហេតុការណ៍ នាព្រឹកថ្ងៃព្រហស្បតិ៍ ទី០២ ខែវិច្ឆិកា ឆ្នាំ២០១៧។
បណ្តាញព័ត៌មានបរទេសជាច្រើនបានចេញផ្សាយថា យោធាមីយ៉ាន់ម៉ា បានយកលែសថា ជនជាតិរ៉ូហ៊ីងយ៉ាមួយចំនួន គឺជាក្រុមភេរវករដែលបង្កការអុកឡុក ក្នុងរដ្ឋរ៉ាឃីន ទើបខ្លួនធ្វើការបង្ក្រាប ដែលជាហេតុនាំឲ្យជនជាតិរ៉ូហ៊ីងយ៉ាប្រមាណជាង ៦០០,០០០នាក់ ទៅហើយ ត្រូវរត់ភៀសខ្លួន ទៅជ្រកកោណជាបណ្តោះអាសន្ន នៅប្រទេសបង់ក្លាដែស ដោយផ្សងគ្រោះថ្នាក់នឹងគ្រាប់មីន ព្រមទាំងការលិចទូក បណ្តាលឲ្យស្លាប់រាប់ពាន់នាក់ទៅហើយ។
គួរបញ្ជាក់ថា ទោះបីជាលោកស្រី ស៊ូជី ហាក់មិនអាចមានលទ្ធភាពក្នុងការលូកដៃ ចូលក្នុងកិច្ចការយោធា ដើម្បីដោះស្រាយវិបត្តិរ៉ូហ៊ីងយ៉ាក៏ដោយ ប៉ុន្តែការរិះគន់ភាគច្រើន គឺឆ្ពោះមកកាន់លោកស្រីផ្ទាល់តែម្តង ពីព្រោះតែលោកស្រី គឺជាមេដឹកនាំនៃរដ្ឋាភិបាលស៊ីវិលមីយ៉ាន់ម៉ា ដែលគួរណាស់តែត្រូវប្រើប្រាស់អំណាចទៅតាមផ្លូវច្បាប់ និងប្រកបដោយភាពត្រឹមត្រូវក្នុងការពារជនជាតិ រ៉ូហ៊ីងយ៉ា ដែលកំពុងតែរងទុក្ខវេទនា ចំពោះមុខក្រសែភ្នែកអន្តរជាតិ។
សេចក្តីរាយការណ៍ចុងក្រោយបានឲ្យដឹងថា ពេលនេះលោកស្រី ស៊ូជី កំពុងស្ថិតនៅទីក្រុង Sittwe ហើយនឹងបន្តដំណើរទៅទីក្រុង Maungdaw ព្រមទាំង Buthiduang ផងដែរ ដែលសុទ្ធសឹងតែជាតំបន់ កំពុងប្រមូលផ្តុំដោយបញ្ហា៕
