(ថនតុន)៖ មនុស្សមួយចំនួន​បានទទួលរង​ការបាញ់ប្រហារ នៅក្នុងហាងមួយឈ្មោះ Walmart នៃជាយទីក្រុង Denver រដ្ឋខូឡូរ៉ាដូ (Colorado) សហរដ្ឋអាមេរិក នៅថ្ងៃពុធសប្តាហ៍នេះ ខណៈព័ត៌មានជាបឋមគឺ មនុស្ស ០២នាក់ស្លាប់ និងម្នាក់រងរបួស ដែលបង្កឡើង​ដោយខ្មាន់កាំភ្លើងម្នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន Retuers នាព្រឹកថ្ងៃព្រហស្បតិ៍ ទី០២ ខែវិច្ឆិកា ឆ្នាំ២០១៧។

ប៉ូលិសនៅក្នុងក្រុង ថនតុន (Thornton) រដ្ឋខូឡូរ៉ាដូ បានបញ្ជាក់ថា «មនុស្សស្លាប់ទាំងពីរនាក់​គឺជាបុរស ហើយស្ត្រីម្នាក់រងរបួសត្រូវបានបញ្ជូនទៅមន្ទីរពេទ្យ»។ បន្ថែមពីនេះ ប៉ូលិស​មិនបានបញ្ជាក់ថា ខ្មាន់កាំភ្លើងត្រូវបានបាញ់សម្លាប់ ឬក៏ចាប់ខ្លួននោះឡើយ ដោយសារតែ​កន្លែងកើតហេតុមានសភាពតានតឹង ហើយមនុស្សម្នាត្រូវបានប្រាប់​ឲ្យនៅ​ឆ្ងាយ​ពីកន្លែងកើតហេតុ។

គួរបញ្ជាក់ថា ហេតុការណ៍ដែលបាន​បង្កការភ្ញាក់ផ្អើលដល់ប៉ូលិសនោះ ដំបូងឡើយគឺស្នូរ​កាំភ្លើង បានលាន់លឺឡើង​ចេញពីហាង​លក់ទំនិញ Walmart (បើតាមសាក្សី បានលឺចំនួន ០៦គ្រាប់) រួចប៉ូលិស​ក៏បញ្ជូន​កម្លាំង​ទៅកាន់​កន្លែងកើតហេតុតែម្តង។ ក្រុងថនតុន មានប្រជាជនរស់នៅ ១៣៦,០០០នាក់ ដែលមាន​ចម្ងាយប្រមាណ ១៦គីឡូម៉ែត្រប៉ុណ្ណោះ ពីទីក្រុង Denver ដែលជាទីក្រុងធំរបស់រដ្ឋខូឡូរ៉ាដូ៕