(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ នៅថ្ងៃពុធនេះ​បាននិយាយថា លោកបាន​បញ្ជា​ឱ្យក្រសួងសន្តិសុខ​មាតុភូមិ រឹតបន្តឹងកម្មវិធី​ទទួលយក​ជនភៀសខ្លួន បន្ទាប់ពីបុរស​ម្នាក់ដែល​គេសង្ស័យថា ជាបណ្ដាញរបស់​ពួក ISIS បានបើក​រថយន្ដបំបុក​សម្លាប់​មនុស្ស ០៨នាក់ និង ១១នាក់រងរបួសធ្ងន់​នៅក្នុង​សង្កាត់ ឡូវើ មែនហាធិន (Lower Manhattan) នៃទីក្រុង ញូយ៉ក (New York) កាលពី​ថ្ងៃអង្គារ។ នេះបើតាម​ការចេញផ្សាយ​ដោយសារព័ត៌មាន Sputnik​ នៅរសៀលថ្ងៃពុធ ទី០១ ខែវិច្ឆិកា ឆ្នាំ២០១៧។

យោងតាមប្រព័ន្ធ​ផ្សព្វផ្សាយ​អាមេរិក កំណត់​ហេតុមួយ​ជាភាសាអង់គ្លេស ត្រូវបានគេរកឃើញនៅ​ក្នុងរថយន្ដមួយ​គ្រឿង ដែលប៉ូលិសជឿ​ជាក់ថា ត្រូវជនសង្ស័យ​ប្រើប្រាស់នៅក្នុង​ការវាយប្រហារ​នេះ។ ដោយឡែក ភ្លាមៗក្រោយ​ការវាយប្រហារ​នេះដែរ លោក ដូណាល់ ត្រាំ បានបញ្ជាឱ្យ​ក្រសួងសន្តិសុខ​មាតុភូមិ រឹតបន្តឹង​កម្មវិធីទទួលយក​ជនភៀសខ្លួន ក៏ដូចជា សន្យាថា នឹងកម្ទេចពួក ISIS ឱ្យដល់​ទីបំផុត។

លោក ត្រាំ បានសរសេរ​នៅលើ Twitter យ៉ាងដូច្នេះថា «ខ្ញុំបានបញ្ជា​ឱ្យក្រសួងសន្តិសុខ​មាតុភូមិ រឹតបន្តឹងកម្មវិធី Extreme Vetting Program របស់យើង... ហើយយើង​ត្រូវតែធ្វើ​យ៉ាងណា កុំឱ្យពួក ISIS ត្រឡប់ ឬចូលក្នុងទឹកដី​របស់យើងជាថ្មី​ម្ដងទៀត ក្រោយយើង​កម្ទេចពួកគេនៅ​ក្នុងតំបន់​មជ្ឈិមបូព៌ា និងគ្រប់ទី​កន្លែង​ទាំងអស់»។

គួរបញ្ជាក់ថា ប៉ូលិសអាមេរិក​បានបញ្ជាក់អត្តសញ្ញាណ​ជនសង្ស័យ​មានឈ្មោះ សាយហ្វូលឡូ សាយផូវ (Sayfullo Saipov) មានអាយុ ២៩ឆ្នាំ បន្ទាប់ពីរូបគេ​ត្រូវបានបាញ់​ឱ្យរបួស និងកំពុងវះកាត់​នៅក្នុង​មន្ទីរពេទ្យ។ ជនឈ្មោះ Saipov គឺជាជនអន្តោប្រវេសន៍ម្នាក់ ដែលបានមករស់នៅក្នុង​សហរដ្ឋអាមេរិក កាលពី​ឆ្នាំ២០១០៕