(វ៉ាស៊ីនតោន)៖ មន្ត្រីអនុវត្ត​ច្បាប់ជាន់ខ្ពស់អាមេរិក​ម្នាក់បាន​ឱ្យដឹងថា ប៉ូលិស​បានរកឃើញ​កំណត់ហេតុមួយជាភាសា​អង់គ្លេស ដែលបានអះអាងថា ជនសង្ស័យបើកការវាយប្រហារ​កាលពី​ថ្ងៃអង្គារ ស្លាប់មនុស្ស ០៨នាក់ នៅក្នុងទីក្រុង ញូយ៉ក (New York) គឺជាបណ្ដាញ​របស់ពួក ISIS។ នេះបើតាម​ការចេញផ្សាយ​ដោយ សារព័ត៌មាន CNN នៅព្រឹកថ្ងៃពុធ ទី០១ ខែវិច្ឆិកា ឆ្នាំ២០១៧។

យោងតាមមន្ត្រី​រូបនេះ​ដដែល កំណត់ហេតុខាងលើ​ត្រូវបានគេ​រកឃើញ នៅក្នុងរថយន្ដ​មួយគ្រឿង ដែលប៉ូលិសជឿ​ជាក់ថា ត្រូវបានជនសង្ស័យប្រើប្រាស់ នៅក្នុងការ​វាយប្រហារនេះ ហើយ មិនតែប៉ុណ្ណោះ ប៉ូលិសបានអះអាង​ដែរថា រូបគេបានជួល​រថយន្ដនេះ​នៅក្នុង​រដ្ឋ ញូចេស៊ី (New Jersey)។ ប៉ូលិសអាមេរិក បានបញ្ជាក់អត្តសញ្ញាណជនសង្ស័យមានឈ្មោះ សាយហ្វូលឡូ សៃផូវ (Sayfullo Saipov) មានអាយុ ២៩ឆ្នាំ បន្ទាប់ពីរូបគេត្រូវ​បានបាញ់​ឱ្យរបួស និងកំពុងវះកាត់បន្តជីវិត​នៅក្នុងមន្ទីរពេទ្យ។

គួរបញ្ជាក់ថា មនុស្សយ៉ាងហោចណាស់ ០៨នាក់បានស្លាប់ និង ១១នាក់ទៀត​រងរបួសធ្ងន់ នៅពេលបុរសម្នាក់​បានបើករថយន្ត pickup មួយគ្រឿង បំបុកហ្វូងមនុស្ស​នៅក្នុងសង្កាត់ Lower Manhattan ក្បែរ Wold Trade Center៕