(វ៉ាស៊ីនតោន)៖ បើជាទោះជាមានការជំទាស់ពីចិនក៏ដោយ នៅទីបំផុតយន្ដហោះប្រធានាធិបតីតៃវ៉ាន់ លោកស្រី ត្សៃ អ៊ីងវិន (Tsai Ing-wen) បានទៅដល់ទីក្រុង Honolulu នៃរដ្ឋ Hawaii របស់សហរដ្ឋអាមេរិកហើយ មុននឹងបន្តដំណើរទស្សនកិច្ចទៅកាន់តំបន់ដែនកោះចំនួនបីនៅក្នុងតំបន់ប៉ាស៊ីហ្វិក ដែលជាសម្ព័ន្ធមិត្តតៃវ៉ាន់។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters នៅថ្ងៃអាទិត្យ ទី២៩ ខែតុលា ឆ្នាំ២០១៧។  

លោកស្រី Tsai Ing-wen បានចាប់ផ្ដើមធ្វើ​ដំណើរ កាលពីថ្ងៃសៅរ៍ (ម៉ោងនៅក្នុងតំបន់) ក្រោមក្របខណ្ឌ​នៃដំណើរទស្សនកិច្ច​រយៈពេលមួយ​សប្ដាហ៍ ទៅកាន់តំបន់​ដែនកោះចំនួនបី​នៅក្នុង តំបន់ប៉ាស៊ីហ្វិករួមមាន Tuvalu, Solomon និង Marshall ដោយឆ្លងកាត់​តាមទីក្រុង Honolulu និងកោះ Guam។ ក៏ប៉ុន្តែ ជុំវិញដំណើរទស្សនកិច្ចនេះដែរ ក្រសួង​ការបរទេសចិនបានអំពាវ នាវឱ្យ​សហរដ្ឋអាមេរិក កុំបណ្ដោយ​ប្រធានាធិបតី​តៃវ៉ាន់ លោកស្រី ត្សៃ អ៊ីងវិន (Tsai Ing-wen) ធ្វើដំណើរកាត់​តាមទឹកដី​អាមេរិក ឆ្ពោះទៅ និង​មកពីដែនដី​ជាសម្ព័ន្ធមិត្ត​របស់តៃវ៉ាន់ នៅក្នុង តំបន់​ប៉ាស៊ីហ្វិកឱ្យសោះ។ «ចិនបានបង្ហាញ​គោលជំហរ​យ៉ាងម៉ឺងម៉ាត់ ទៅកាន់​សហរដ្ឋអាមេរិកចំពោះ​បញ្ហានេះ ក៏ដូចជាជំរុញឱ្យទីក្រុង​វ៉ាស៊ីនតោន គោរពឱ្យបានខ្ជាប់ខ្ជួននូវគោលនយោបាយ ចិន​តែមួយ»។ នេះបើតាមអ្នកនាំពាក្យ​ក្រសួងការបរទេស​ចិន លោក Geng Shuang ថ្លែងនៅក្នុងសន្និសីទសារព័ត៌មានកាលពីថ្ងៃសុក្រ។ យ៉ាងណាក៏ដោយ ទីក្រុងវ៉ាស៊ីនតោន កាលពីថ្ងៃសៅរ៍ បានបញ្ជាក់ថា ដំណើររបស់លោកស្រី ត្សៃ អ៊ីងវិន កាត់តាមទឹកដីអាមេរិក គ្រាន់តែជាការធ្វើដំណើរលក្ខណៈឯកជន និងក្រៅផ្លូវការតែប៉ុណ្ណោះ ដែលនេះបញ្ជាក់ថាសហរដ្ឋ អាមេរិក មិនមានបំណងផ្លាស់ប្ដូរគោលនយោបាយចិនតែមួយនោះឡើយ។   

គួរបញ្ជាក់ថា ការអំពាវនាវខាងលើរបស់ចិន ត្រូវបានគេមើលឃើញថាជាការធ្វើតេស្ដមួយលើគោលជំហរអាមេរិកចំពោះកោះតៃវ៉ាន់ ដែលទីក្រុងប៉េកាំងចាត់ទុកថាជាខេត្តរបស់ខ្លួន មុននឹង ប្រធានាធិបតី​អាមេរិក លោក ​ដូណាល់ ត្រាំ បំពេញដំណើរ​ទស្សនកិច្ចមក​កាន់ទីក្រុងប៉េកាំង នៅខែវិច្ឆិកាខាងមុខនេះ៕