(ម៉ានីល)៖ មន្ត្រីការទូត​ជាន់ខ្ពស់​អាមេរិកម្នាក់ បានចេញមុខទាត់​ចោលការ​ចោទប្រកាន់​ដែលថា ទីភ្នាក់ងារ​ស៊ើបការណ៍​សម្ងាត់អាមេរិក CIA បាននិងកំពុង​រៀបចំផែនការ​​បង្កអស្ថេរភាព ដើម្បីសម្លាប់ និងទម្លាក់លោក​ប្រធានាធិបតី​ហ្វីលីពីន លោក រ៉ូឌ្រីហ្គោ ឌូតឺតេ ចេញពី​តំណែង។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន Anadoulu នៅរសៀលថ្ងៃសុក្រ ទី២៧ ខែតុលា ឆ្នាំ២០១៧។

ថ្លែងទៅក្រុមអ្នក​សារព័ត៌មានកាលពី​ថ្ងៃព្រហស្បតិ៍ អគ្គរដ្ឋទូតអាមេរិកប្រចាំ​ហ្វីលីពីន លោក ស៊ុង គីម (Sung Kim) បានគូសបញ្ជាក់យ៉ាងដូច្នេះថា «ដាច់ខាតគ្មាន​ឡើយកិច្ចខិតខំ​ប្រឹងប្រែង​របស់ CIA ដើម្បីបំផ្លាញ​មេដឹកនាំ​ហ្វីលីពីន... លោក​ប្រធានាធិបតី ឌូតឺតេ បានឈ្នះឆ្នោត​ដ៏គួរឱ្យ​ភ្ញាក់ផ្អើល ហើយយើង​ពិតជាគោរពលទ្ធផលបោះឆ្នោត​របស់គាត់ ក៏ដូចជាកំពុង​ធ្វើការងារយ៉ាង ល្អទំាងអស់គ្នា​ជាមួយរដ្ឋបាល​របស់គាត់»។

គួរបញ្ជាក់ថា ការថ្លែងបែប​នេះ​របស់ លោក Sung Kim ធ្វើឡើងបន្ទាប់​ពីលោក ឌូតឺតេ ផ្ទាល់បាន​ចង្អុលមុខ CIA ថាកំពុងរៀបចំផែនការ​សម្លាប់រូបលោក។ «សម្រាប់ខ្ញុំ យើងសូមប្រាប់​ប្រជាជន ហ្វីលីពីនថា បើសិនជា​ខ្ញុំស្លាប់ គឺសហរដ្ឋអាមេរិក​ជាអ្នកនៅពីក្រោយ ពោលគឺ CIA​ តែម្ដង»។ នេះបើតាម​លោក រ៉ូឌ្រីហ្គោ ឌូតឺតេ ដែលទើបតែទទួលបាន​ជោគជ័យធំធេង នៃការកម្ចាយ​បណ្តាញក្រុម ISIS ពីទីក្រុងម៉ារ៉ាវី (Marawi) ភាគខាងត្បូង៕​