(ម៉ានីល)៖ រដ្ឋមន្ត្រី​ការពារជាតិ​ហ្វីលីពីន​នៅថ្ងៃចន្ទនេះ បានប្រកាសបញ្ចប់​ការវាយប្រយុទ្ធគ្នា​នៅក្នុងទីក្រុង ម៉ារ៉ាវី (Marawi) នៃភាគខាងត្បូង​ប្រទេស​ហ្វីលីពីនហើយ ខណៈ​​សាកសព​មនុស្ស ៤០នាក់ ដែលជាក្រុមសកម្មប្រយុទ្ធ ត្រូវបានកងទ័ព​ប្រទះឃើញ ដែលពួក​គេអាច​ជា​អ្នកតស៊ូ​ប្រយុទ្ធ រហូតដល់តំណាក់កាលចុងក្រោយ នៅទីក្រុង​ដែលធ្លាប់ស្ថិតនៅ​ក្រោមការ​គ្រប់គ្រង នៃបណ្តាញ​ក្រុម ISIS មួយនេះ។ នេះបើតាមការ​​ចេញផ្សាយ​ដោយ ទីភ្នាក់ងារសារព័ត៌មាន Reuters​ នៅរសៀលថ្ងៃចន្ទ ទី២៣ ខែតុលា ឆ្នាំ២០១៧។

ថ្លែងនៅក្នុងសន្និសីទសារព័ត៌មាន រដ្ឋមន្ត្រីការពារជាតិ​ហ្វីលីពីន លោក ឌែលហ្វីន ឡូរិនហ្សាណា (Delfin Lorenzana) បានលើក​ឡើងយ៉ាងខ្លី​ដូច្នេះថា «គ្មានពួកសកម្ម​ប្រយុទ្ធណា​ម្នាក់ នៅក្នុងទីក្រុង Marawi ទៀតនោះទេ»​។ ជាងនេះទៅ​ទៀត លោក​ក៏បានសង្កត់ធ្ងន់ដែរថា កងទ័ព​ហ្វីលីពីន បានរកឃើញបណ្តុំ​សាកសព​មនុស្ស ៤០នាក់ ដែលគេសង្ស័យថា ជាពួក​សកម្មប្រយុទ្ធ នៅក្នុងអគារពីរទីតាំង និងឯវិហារ​អ៊ីស្លាម​មួយកន្លែង ក្នុង​តំបន់ធ្លាប់ជាសមរភូមិប្រយុទ្ធគ្នា។

គួរបញ្ជាក់ថា ការប្រកាសនៅដើមសប្តាហ៍ថ្មី អំពីជោគជ័យនៃសង្គ្រាម របស់រដ្ឋបាលលោក រ៉ូឌ្រីហ្គោ ឌូតឺតេ នេះបានកើតឡើងតែប៉ុន្មានថ្ងៃប៉ុណ្ណោះបន្ទាប់ពី មេដឹកនាំក្រុម​ឧទ្ទាមធំបំផុត នៅភាគខាងត្បូងប្រទេសហ្វីលីពីន អាប៊ូសាយយ៉ាហ្វ ​ត្រូវបានទីភ្នាក់ងារ​ស៊ើបអង្កេត​សហព័ន្ធរបស់អាមេរិក FBI បញ្ជាក់ក្រោយ​ការតាមដាន​យ៉ាង​ល្អិតល្អន់ថា ពិតជាបាន​ស្លាប់ប្រាកដមែន នៅមុនប៉ុន្មានថ្ងៃ​នៃការរំដោះទីក្រុង ម៉ារ៉ាវី (Marawi) កាលពីដើម​សប្តាហ៍នេះ។

រដ្ឋមន្ត្រីការពារជាតិហ្វីលីពីន លោក ដែលហ្វីន ឡរ៉េនហ្សាណា ​(Delfin Lorenzana) បាន​បញ្ជាក់យ៉ាងដូច្នេះថា «មេដឹកនាំអាប៊ូសាយយ៉ាហ្វ គឺលោក អ៊ីសនីឡូន ហាភីឡូន (Isnilon Hapilon) ពិតជាបានស្លាប់ប្រាកដមែន។ បុគ្គលរូបនេះ គឺជា​អ្នកដឹកនាំក្រុម​ភេរវករ​នៅភាគ​ខាងត្បូង​ប្រទេស​ហ្វីលីពីន ដែលមានទំនោរគាំទ្រក្រុម ISIS ដែលជាបណ្តាញ​ភេរវករ​ធំបំផុត​នៅលើពិភពលោក»។

នៅក្នុងសេចក្តីថ្លែងការណ៍របស់ក្រសួងការពារជាតិហ្វីលីពីន បានអះអាងបន្ថែមទៀតថា «យើងបានទទួលរបាយការណ៍ផ្លូវការ ពីទីភ្នាក់ងារ FBI របស់អាមេរិក ដោយយោងលើ​គំរូ DNA ដែលត្រូវបានយកពីខ្លួនជនសង្ស័យ ដែលត្រូវបានសម្លាប់នៅ Marawi នោះ សាកសព​ពិតជាសាកសព​របស់ Hapilon មេដឹកនាំ​អាប៊ូសាយយ៉ាហ្វ ពិតប្រាកដ»៕