(វ៉ាស៊ីនតោន)៖ រូបគំនូរមួយផ្ទាំង​នៃអគារ Empire State នៅក្នុងទីក្រុងញូយ៉ក សហរដ្ឋអាមេររិក ដែលជាស្នាដៃផ្ទាល់​​របស់​ប្រធានាធិបតី លោក ដូណាល់ ត្រាំ នោះ ត្រូវបានលក់​ចេញដោយ​ក្រុមហ៊ុនដេញថ្លៃមួយ នៅទីក្រុង​ឡូសអាន់​ជែឡែស (Los Angeles) នាពេលថ្មីៗនេះ​ក្នុងតម្លៃ ១៦,០០០ដុល្លារ។ នេះបើតាមការចេញ​ផ្សាយដោយ​ ទីភ្នាក់ងារ​ព័ត៌​មានចិន ស៊ីនហួរ នៅរសៀល​ថ្ងៃសៅរ៍ ទី២១ ខែតុលា ឆ្នាំ២០១៧។

រូបគំនូរបែបគូស​វាសខាងលើមាន​ទំហំ ៣០x៣០សង់ទីម៉ែត្រ និងគូរដោយប្រើទឹក​ប៊ិចពណ៌ខ្មៅ ដែលវាបង្ហាញ​ពីអគារ​​កម្ពស់ ១០២ជាន់ Empire State ដ៏ល្បីឈ្មោះប្រចាំ​ទីក្រុងញូយ៉ក ក៏ដូចជា​សហរដ្ឋអាមេរិក។ ផ្ទាំងគំនូរនេះ ត្រូវបានគេ​ប៉ាន់ស្មានថា មានតម្លៃខ្ទង់ចាប់ពី ៨,០០០ពាន់ដុល្លារ ដល់១២​,០០០ដុល្លារ ក៏ប៉ុន្តែលទ្ធផល​ជាក់ស្តែង ដូចទៅនឹង​​ក្រុម​ហ៊ុន​ដេញថ្លៃ Julien's Auction បានប្រកាស​នោះ​ គឺវាខ្ពស់ជា​ការរំពឹងទុក​ទៅទៀត។

គួរបញ្ជាក់ថា រូបគំនូរមួយ​ផ្ទាំងនេះ ដែលមានទាំង​ហត្ថលេខារបស់លោក ត្រាំ ផ្ទាល់ផងនោះ ត្រូវបានបង្កើត​ឡើង​​ដោយ​លោក​ប្រធានាធិបតីអាមេរិ​ករូបនេះ សម្រាប់កម្មវីធី​ដេញថ្លៃ​សប្បុរសធម៌មួយ នៅឯរដ្ឋផ្លូរីដា កាល​ពី​អំឡុង​​លោក ដូណាល់ ត្រាំ បានចាប់​ផ្តើមបើក​​ក្លឹប-រមណីយដ្ឋាន​ឯកជន Mar-a-Lago កាលពី​ឆ្នាំ១៩៩៥។

ដោយឡែក នេះពុំមែនជា​លើកទី០១ឡើយ ដែលផ្ទាំងគំនូរជាស្នាដៃ​របស់លោក ដូណាល់ ត្រាំ ត្រូវបានលក់ចេញ​​ដោយក្រុមហ៊ុន​ដេញថ្លៃ។ តួយ៉ាង កាលពីខែកក្កដា​កន្លងទៅ រូបគំនូរមួយផ្ទាំង​ផ្សេងទៀត ស្តែងពីទិដ្ឋភាព​អគារជាប់​នឹងជើងមេឃ​នៅក្នុងសង្កាត់ Manhattan នៃទីក្រុង​ញូយ៉កនោះ ដែលគូរដោយអតីត​មហាសេដ្ឋីអចលនទ្រព្យរូបនេះ កាលពីឆ្នាំ២០០៥ ត្រូវបានលក់​ក្នុងតម្លៃ ២៩,១៨៤ដុល្លារ៕