(កាប៊ុល)៖ បន្ទាប់ពីគ្រាប់​រ៉ុក្កែត​ចំនួន ០២គ្រាប់ ត្រូវបានបាញ់​ផ្លោងចូលទៅ​ចំកណ្តាលទីក្រុង​កាប៊ុល នៃប្រទេស​អាហ្វ​ហ្គា​នីស្ថាន គេបានសង្កេតឃើញថាពុំមានសេចក្តីរាយការណ៍ បញ្ជាក់ពីមនុស្សរងគ្រោះ ឬក៏ការខូចខាតធ្ងន់ធ្ងរ ពី​ហេតុ​ការណ៍​នេះឡើយ។ នេះបើតាម​ការចេញផ្សាយ​ដោយសារព័ត៌មាន Straits Times នៅរសៀលថ្ងៃសៅរ៍ ទី២១ ខែតុលា ឆ្នាំ​២០១៧។

កាលពីវេលា​ម៉ោងប្រមាណ​ ០៦៖១០នាទី​ព្រឹកថ្ងៃសៅរ៍នេះ (ម៉ោងក្នុងតំបន់) សំឡេង​ស៊ីរ៉ែន​ប្រកាស​អាសន្ន បាន​បន្លឺ​ឡើង​នៅទីស្នាក់ការ​របស់កងកម្លាំងយោធា​ចម្រុះ ដឹកនាំ​ដោយ​អង្គការ NATO ព្រមទាំង​ស្ថានទូត​បរទេស​មួយចំនួន​ទៀតនៅក្នុង​តំបន់នោះ ហើយក្រោយ​មកសំឡេងផ្ទុះ​នៃគ្រាប់រ៉ុក្កែត​ ក៏បានលាន់ឡើង​យ៉ាង​កក្រើក។

គួរបញ្ជាក់ថា ហេតុការណ៍​ដ៏ភ្ញាក់ផ្អើល​ខាងលើ បានកើតឡើង​មួយថ្ងៃ បន្ទាប់ពីមាន​ការវាយប្រហារ​ដោយ​បំផ្ទុះគ្រាប់​បែកអត្តឃាត​ដ៏ប្រល័យ​ចំនួន ០២ករណី​ដាច់ដោយឡែក​ពីគ្នា ទៅលើព្រះវិហារ ០២កន្លែង ក្នុងរដ្ឋធានី​កាប៊ុល និងខេត្ត ហ្គ័រ (Ghor) ដែលជាលទ្ធផល​បានផ្តាច់ជីវិត​មនុស្សយ៉ាងតិច ៧២នាក់ និងបណ្តាល​ឲ្យរបួស​ជាច្រើននាក់​ផ្សេងទៀត៕