(យូអិន)៖ មកទល់ពេលនេះជនភៀសខ្លួនរ៉ូហ៊ីងយ៉ា ៥៩០,០០០នាក់ហើយ បានរត់ទៅជ្រកកោណនៅក្នុងជំរុំ នៃប្រទេសបង់ក្លាដែស ខណៈកុមារតូចៗក្នុងចំណោមនោះ ដល់ទៅប្រមាណ ៣២០,០០០នាក់ កំពុងទទួលរងការគំរាមកំហែងយ៉ាងខ្លាំងពីជំងឺផ្សេងៗ និងការរស់នៅដោយអស់សង្ឃឹម។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសៅរ៍ ទី២១ ខែតុលា ឆ្នាំ២០១៧។
បើតាមអ្នកនាំពាក្យអង្គការសហប្រជាជាតិ លោក ហ្វាហាន ហាក (Farhan Haq) ការិយាល័យសម្របសម្រួលកិច្ចការមនុស្សធម៌ (OCHA) របស់ UN បានរាយការណ៍ថា ជនជាតិដើមភាគតិចមូស្លីមរ៉ូហ៊ីងយ៉ាចំនួន ៥៨៩,០០០នាក់ បានរត់ភៀសខ្លួនចេញពីរដ្ឋរ៉ាឃីន (Rakhine) ភាគខាងជើងមីយ៉ាន់ម៉ា គិតចាប់តាំងពីមានប្រតិបត្តិការបង្រ្កាបយ៉ាងចាស់ដៃ ពីកម្លាំងរដ្ឋាភិបាល ក្រោយពីការវាយប្រហារដ៏ប្រល័យដោយក្រុមសកម្មប្រយុទ្ធ កាលពីថ្ងៃទី២៥ ខែសីហា ឆ្នាំ២០១៧ ទៅលើប៉ុស្តិ៍ប៉ូលិសមីយ៉ាន់ម៉ាជាច្រើនទីតាំង។
ជាមួយគ្នានេះអង្គការ UNICEF បានបញ្ជាក់ថា ស្ថានភាពរស់នៅប្រកបដោយភាពអស់សង្ឃឹម និងជំងឺផ្សេងៗ កំពុងបង្កការគំរាមកំហែងជាខ្លាំងដល់កុមារភៀសខ្លួនច្រើនជាង ៣២០,០០០នាក់ ដែលបានរត់ទៅជ្រកកោណនៅបង់ក្លាដែស។
គួរបញ្ជាក់ថា សន្និសីទដើម្បីស្វែងរកម្ចាស់ជំនួយ សម្រាប់ដើមសប្តាហ៍ក្រោយ ក្នុងទីក្រុងហ្សឺណែវ ប្រទេសស្វីសក៏ត្រូវបានប្រកាសថា នឹងធ្វើឡើង កាលពីដើមសប្តាហ៍នេះផងដែរ ដោយក្រុមមន្រ្តីមានក្តីសង្ឃឹមថា នឹងអាចរៃអង្គាសថវិកាបានចំនួនយ៉ាងហោចណាស់ ៤៣៤លានដុល្លារ ដើម្បីជួយដល់ជនភៀសខ្លួនរ៉ូហ៊ីងយ៉ា ក៏ដូចជាអ្នកដែលបានទទួលឲ្យពួកគេជ្រកកោណ។ ដោយឡែក មកទល់ពេលនេះថវិកាត្រឹម ២៦ភាគរយប៉ុណ្ណោះក្នុងចំណោមនោះ ទើបសម្រេចបាន៕
