(ដាម៉ាស់)៖ សង្រ្គាមនៅក្នុងទីក្រុង រ៉ាកកា (Raqqa) ប្រទេសស៊ីរី ដែលបានដល់ទីបញ្ចប់ជាបណ្ដោះអាសន្ន បានផ្ដាច់យកអាយុជីវិតមនុស្ស ៣,២៥០នាក់ និងបំផ្លាញទីក្រុងមួយស្ទើរគ្មានសល់ចន្លោះ ក្នុងរយៈពេលច្រើនជាង ០៤ខែ កន្លងមកនេះ។ នេះបើតាមការដកស្រង់របាយការណ៍ពីបណ្តាញព័ត៌មាន CNN នាព្រឹកថ្ងៃពុធ ទី១៧ ខែតុលា ឆ្នាំ២០១៧។
កាលពីថ្ងៃអង្គារ កងកម្លាំងប្រជាធិបតេយ្យឃើដ-អារ៉ាប់ស៊ីរី SDF បានប្រកាសថា ខ្លួនដណ្ដើមគ្រប់គ្រងទីក្រុង Raqqa បានទាំងស្រុងហើយ បន្ទាប់ពីការវាយប្រយុទ្ធគ្នាជាមួយពួក ISIS អស់រយៈពេលច្រើនជាង ០៤ខែ មកនេះ។ ប៉ុន្តែអង្គការឃ្លាំមើលសិទ្ធិមនុស្សស៊ីរី SOHR ក៏បាននិយាយដែរថា ការវាយប្រយុទ្ធគ្នា និងការទម្លាក់គ្រាប់បែក បានបំផ្លាញស្ទើរគ្មានសល់នៅទីក្រុង Raqqa របស់ស៊ីរី ព្រមទាំងផ្ដាច់យកអាយុជីវិតជនស៊ីវិលស្លូតត្រង់ ១,១៣០នាក់ ក្នុងនោះមានកុមារ ២៧០នាក់ និង ២,១២០នាក់ ជាក្រុមអ្នកប្រយុទ្ធ ISIS និងកងកម្លាំងគំាទ្រដោយ សហរដ្ឋអាមេរិកចាប់តាំងពីថ្ងៃទី០៥ ខែមិថុនាមក។
ខាងក្រោមនេះ គឺជារូបភាព និងវីដេអូថតពីលើទីក្រុង Raqqa ក្រោយត្រូវបានរំដោះពីពួក ISIS៖
