(វ៉ាស៊ីនតោន)៖ នាយក​ក្រុមហ៊ុន Amazon Studio​ ដែលជាបុត្រសម្ព័ន្ធ​របស់ក្រុមហ៊ុន Amazon​ លោក រ៉យ ប្រាយស៍ (Roy Price) ត្រូវបាន​គេដាក់ឱ្យ​សម្រាកពីការងារ​ជាបន្ទាន់​មួយរយៈ កាលពីថ្ងៃ​ព្រហស្បតិ៍ បន្ទាប់ពីមាន​សេចក្ដី​រាយការណ៍ថា លោកបាន​គំរាមកំហែង​ផលិតករ​ម្នាក់ និងមិនរវីរវល់​ចំពោះការស្នើពីតារាសម្ដែង​ស្រីម្នាក់ ដែលបានអះអាងថា នាងត្រូវបាន​ផលិតករ លោក ហាវេយ វីអ៊ីនស្ទែន (Harvey Weinstein) រំលោភ​បំពានផ្លូវភេទ។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន Reuters នៅព្រឹកថ្ងៃសុក្រ ទី១៣ ខែតុលា ឆ្នាំ២០១៧។​

ជាមួយគ្នានោះដែរ បើតាម​សារព័ត៌មាន Hollywood Reporter ផលិតករខ្សែភាពយន្ដ​ម្នាក់របស់​ក្រុមហ៊ុន Amazon.com Inc’s លោក​ស្រី អ៊ីសា ហេកខេត (Isa Hackett) បានចោទ​ប្រកាន់ថា លោក Roy Price ធ្លាប់គំរាម​កំហែងរូបនាង​កាលពី​ឆ្នាំ២០១៥ តែលោកស្រី​បានបដិសេធ​ធ្វើអត្ថាធិប្បាយ​ណាមួយឡើយ។ ក៏ប៉ុន្តែកាលពី​ថ្ងៃព្រហស្បតិ៍ តារា​សម្ដែងស្រី រ៉ូស ម៉ាកហ្គោវ៉ាន (Rose McGowan) បានសរសេរ​នៅលើ Twitter ថារូបនាង​បានប្រាប់ Price ថា ខ្លួនត្រូវបាន​លោក Harvey Weinstein រំលោភបំពាន​ផ្លូវភេទ ខណៈ​កាសែត New York Times ក៏បានចុះផ្សាយ​ថា ផលិតករូបនេះបាន ប្រព្រឹត្តអំពើបែប​នេះ​លើតារាស្រី​ជាច្រើននាក់​ទៀត​ផងដែរ។

តែទោះជា​យ៉ាងនេះក្ដី អ្នកនាំ​ពាក្យ លោក Harvey Weinstein បានបញ្ជាក់​ថា រាល់ការចោទប្រកាន់​ពីបទរំលោភផ្លូវភេទ​មិនសមហេតុសមផល​ទាំងអស់ ត្រូវបានបដិសេធ​ដោយ លោក Weinstein៕