(យូអិន)៖ ចំនួនជនភៀស​ខ្លួនមូស្លីមរ៉ូហ៊ីងយ៉ា ដែលរត់ចេញពីរដ្ឋរ៉ាឃីន (Rakhine) ភាគខាងជើងនៃប្រទេសមីយ៉ាន់ ទៅកាន់ប្រទេសបង់ក្លាដែស​នោះ បានកើនដល់ ៥៣៦,០០០នាក់ហើយ។ នេះបើតាមរបាយការណ៍ចុងក្រោយពី​អង្គការសហប្រជាជាតិ (UN) ដកស្រង់ដោយ​ទីភ្នាក់ងារព័ត៌មានចិន ស៊ីនហួរ នៅព្រឹក​ថ្ងៃសុក្រ ទី១៣ ខែតុលា ឆ្នាំ២០១៧។

បើតាម​អ្នកនាំពាក្យ UN លោក ហ្វាហាន ហេព Farhan Hap បណ្តាទីភ្នាក់ងារ មនុស្សធម៌ UN បាន រាយការណ៍ថា មកទល់ពេលនេះ​ចំនួនជនភៀសខ្លួន​​​ ដែលបាន​ចាកចេញពីមីយ៉ាន់ម៉ា ចូលទៅក្នុងទឹកដី​បង់ក្លាដែស គិតចាប់តាំង​តែពីចុងខែសីហា​មកនោះ បានកើនឡើង​ដល់ ៥៣៦,០០០នាក់ ដោយក្នុងអំឡុង ០២ថ្ងៃ ចុងក្រោយនេះ​ជនជាតិរ៉ូហ៊ីងយ៉ាង​ប្រមាណ ១៤,០០០នាក់ បានធ្វើការឆ្លង​ព្រំដែន​ថែមទៀត។

ជាមួយគ្នានេះ លោក Hap ក៏បានបញ្ជា​ក់ដែរថា អនុរដ្ឋលេខាធិការ UN ទទួលបន្ទុកកិច្ចការ​នយោបាយ លោក ចេហ្វហ្វ្រេយ ហ្វែកមែន (Jeffrey Feltman) ក៏នឹងធ្វើ​ដំណើរទស្សនកិច្ច​នៅមីយ៉ាន់ម៉ា​ ចាប់ពីថ្ងៃទីសុក្រ​សប្តាហ៍នេះ​ រហូតដល់ថ្ងៃអង្គារ​សប្តាហ៍ក្រោយ ផងដែរ ដើម្បីពិភាក្សាជាមួយក្រុម​មន្រ្តីមីយ៉ាន់​ម៉ា​។ បើតាមអ្នកនាំ​ពាក្យ UN ការបំពេញ​ទស្សនកិច្ចនេះ ត្រូវបានធ្វើឡើង​បន្ទាប់ពីការអំពាវនាវ​យ៉ាងទទូច ដោយ​អគ្គលេខាធិការ UN លោក អាន់តូនីញ៉ូ ហ្គូទែរ៉ែស (Antonio Guterres) ឲ្យមានការបញ្ចប់​ប្រតិបត្តិការ​យោធា ក៏ដូចជា​អំពើហិង្សា​នៅរដ្ឋ Rakhine ភាគ​ខាងជើង៕