(សេអ៊ូល)៖ រលកសញ្ញានៃគ្រោះរញ្ជួយដី ត្រូវបានគេដឹងថា បានកើតមានឡើង​នៅក្បែរទីតាំង​សាកល្បងគ្រាប់​បែក​នុយក្លេអ៊ែរ​កូរ៉េខាងជើង នៅវេលា​ម៉ោង ១៖៤១នាទី​រំលងអធ្រាត (ម៉ោងនៅសិង្ហបុរី) ឈាន​ចូលថ្ងៃសុក្រ ទី១៣ ខែតុលា ឆ្នាំ២០១៧នេះ ដោយមាន​កម្រិតមធ្យម ២.៩រ៉ិចទ័រ។ នេះ​បើ​តាមការ​ចេញផ្សាយដោយ សារព័ត៌មាន Channel News Asia ដកស្រង់ពីបណ្តាញ AFP នាព្រឹក​ថ្ងៃសុក្រ ទី១៣ ខែតុលា ឆ្នាំ២០១៧។

តាមទីភ្នាក់ងារ​ស្ទាបស្ទង់​ភូមិសាស្ត្រអាមេរិក USGS ឲ្យដឹងថា គ្រោះរញ្ជួយដី​កម្រិតមធ្យម​ខាងលើនេះ មានជម្រៅពី​ក្នុងដី ០៥គីឡូម៉ែត្រ ដែលស្ថិតនៅ​ភាគខាងជើង នៃទីតាំងធ្វើតេស្ត​នុយក្លេអ៊ែរកូរ៉េខាងជើង ភុងគ្យេរី (Punggye-Ri) មិនឆ្ងាយប៉ុន្មាន​នោះឡើយ។ ទោះបី​ជា​បែបនេះក្តី​ទីភ្នាក់ងារ USGS របស់អាមេរិក​​បានអះអាងថា «យើង​នៅមិនទាន់​អាចបញ្ជាក់​​បានទេថា វាជាការបង្កឡើង​ដោយគ្រោះធម្មជាតិ ឬក៏មនុស្សជា​អ្នកបង្កើត​ហេតុការណ៍នោះ»។

ទោះបីជាវាហាក់​បានបង្កការភ្ញាក់ផ្អើល ឬការ​ភ័យខ្លាចថា កូរ៉េខាងជើង​បានធ្វើតេស្តនុយក្លេអ៊ែរ​ថ្មី​ទៀតក៏ដោយ ប៉ុន្តែទីភ្នាក់ងារ​តាមដានភូមិសាស្ត្រ​កូរ៉េ (KMA) នៅក្នុងប្រទេស​កូរ៉េខាងត្បូង​បាន​អះអាងថា «តាមការព្យាករណ៍ វាគ្រាន់តែជា​គ្រោះធម្មជាតិរញ្ជួយដី​ធម្មតាប៉ុណ្ណោះ ហើយវា​ក៏គ្មានការបំផ្លិចបំផ្លាញ​អ្វីនោះដែរ»។ បន្ថែមពីនេះ​កាលពីបីសប្តាហ៍មុន គ្រោះរញ្ជួយដីកម្រិត ៣.៥រ៉ិចទ័រ ក៏បានកើតមានឡើង នៅតំបន់ដដែលនោះដូចគ្នា៕