(បាងកក)៖ នៅថ្ងៃទី១៣ ខែតុលា ឆ្នាំ២០១៧នេះ គឺខួបគម្រប់មួយឆ្នាំ នៃការសោយទិវង្គត​របស់អតីតព្រះមហាក្សត្រថៃ ព្រះបាទ ភូមិបុល អាឌុលយ៉ាដេ ក្នុងព្រះជន្មាយុ ៨៩ព្រះវស្សា ក្នុងមន្ទីរពេទ្យនៃរាជធានីបាងកក ហើយវាជិតនឹងដល់ពេល ដែលព្រះសពរបស់ព្រះអង្គ ត្រូវយកទៅប្រារព្ធពិធីថ្វាយព្រះភ្លើងផងដែរ។ នេះបើតាមការដកស្រង់ការផ្សាយ ពីសារព័ត៌មាន​បាងកកប៉ុស្តិ៍ នាព្រឹកថ្ងៃសុក្រ ទី១៣ ខែតុលា ឆ្នាំ២០១៧។

សម្រាប់ថ្ងៃសុក្រ និងថ្ងៃសៅរ៍សប្តាហ៍នេះ ព្រះមហាក្សត្រថៃ ព្រះបាទ មហា វ៉ាច្ចរ៉ាឡុងកន នឹងចូលរួមក្នុងព្រះរាជពិធីបុណ្យខួបគម្រប់មួយឆ្នាំគត់ នៃការសោយទិវង្គតរបស់ព្រះបិតា នៅឯមហាវិមាន Grand Palace ក្នុងព្រះបរមរាជវាំងទីក្រុងបាងកក។ នេះបើតាម​សេចក្តីថ្លែងការណ៍ ពីការិយាល័យ​ចាត់ចែងកិច្ចក្នុង​ព្រះបរមរាជវាំងថៃ។

សម្រាប់ទីកន្លែង​ថ្វាយព្រះភ្លើង (ព្រះមេន ឬព្រះមេរុ) ដល់អតីត​ព្រះមហាក្សត្រថៃ ព្រះបាទ ភូមិបុល អាឌុលយ៉ាដេត ដែលនឹងត្រូវប្រារព្ធធ្វើឡើងនៅថ្ងៃទី២៥ ខែតុលា ឆ្នាំ២០១៧​​ខាងមុខនេះ គឺនឹងត្រូវ​បញ្ចប់ការសាងសង់ គឺនៅថ្ងៃទី១៨ ខែតុលា ជាកំហិត។

ព្រះបរមរាជវាំងថៃ (Grand Palace) នៅក្នុងទីក្រុងបាងកក ត្រូវបានបិទទ្វារ​ជាបណ្តោះ​អាសន្នចាប់ពីដើមខែតុលា​នេះមកម្ល៉េះ ដើម្បីត្រៀមប្រារព្ធពិធីថ្វាយ​ព្រះភ្លើង​ដល់ព្រះសព អតីតព្រះមហាក្សត្រ​ថៃ ព្រះបាទ ភូមិបុល អាឌុលយ៉ាដេត មួយឆ្នាំក្រោយ​ព្រះអង្គសោយ​ទិវង្គតកាលពី​ថ្ងៃទី១៣ ខែតុលា ឆ្នាំ២០១៦។

យោងតាមសេចក្តី​ថ្លែងការណ៍របស់ ការិយាល័យទទួលបន្ទុក​កិច្ចការរាជវង្ស ដែលបាន​ចេញកាលពី​ពេលកន្លងទៅនេះ ព្រះរាជវាំងធំ ឬ Grand Palace ព្រមជាមួយ​និងប្រាសាទធំមួយ​ផ្សេងទៀត ត្រូវបានបិទទ្វារ​លែងទទួល​ស្វាគមន៍​អ្នកទស្សនាទាំងជាតិ និងអន្តរជាតិតែម្តង ​តាំងពីថ្ងៃ​ទី៣០ ខែកញ្ញា និងត្រូវរហូតដល់ថ្ងៃទី៣០ ខែតុលាខាងមុខនេះ។

គួរបញ្ជាក់ថា ព្រះរាជពិធីថ្វាយព្រះភ្លើង ដល់ព្រះសពអតីតព្រះមហាក្សត្រ​ថៃ ព្រះបាទ ភូមិបុល អាឌុលយ៉ាដេត នឹងប្រារព្ធឡើង​ចាប់ពីថ្ងៃទី២៥ ដល់ ទី២៩ ខែតុលាខាងមុខ​នេះហើយ៕