(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ បានតែងតាំង​លោកស្រី ឃើសចេន នៀលសិន (Kirstjen Nielsen)​ ជារដ្ឋមន្ត្រី​ក្រសួងសន្តិសុខ​មាតុភូមិ។ លោកស្រី Nielsen ក៏ជា​ជំនួយការ​ម្នាក់របស់​ប្រធាន​សេតវិមាន លោក ចន ឃែលី (John Kelly) ផងដែរ។ នេះបើតាម​សេតវិមាន​ដកស្រង់ដោយ ទីភ្នាក់ងារ​សារព័ត៌មាន​ចិន ស៊ីនហួរ នៅព្រឹកថ្ងៃព្រហស្បតិ៍ ទី១២ ខែតុលា ឆ្នាំ២០១៧។

សេតវិមាន​បានបញ្ជាក់​ នៅក្នុងសេចក្ដីថ្លែងការណ៍​របស់ខ្លួនយ៉ាងដូច្នេះថា «លោកស្រី Kirstjen Nielsen អាយុ ៤៥ឆ្នាំ ដែលបច្ចុប្បន្ន​ជាអនុប្រធាន​សេតវិមាន មានសមត្ថភាព​និងបទពិសោធន៍ វិជ្ជាជីវៈ​ខាងគោលនយោបាយ​សន្តិសុខ យុទ្ធសាស្ត្រ​ សន្តិសុខ​ព័ត៌មានវិទ្យា និងការដោះស្រាយ​បញ្ហា​បន្ទាន់»។ ការតែងតាំង​លោកស្រី Nielsen ជារដ្ឋមន្ត្រីក្រសួង​សន្តិសុខ​មាតុភូមិ ធ្វើឡើង បន្ទាប់​ពីប្រព័ន្ធផ្សព្វផ្សាយ​អាមេរិករាយការណ៍ថា កាលពីថ្ងៃពុធថា​លោកស្រី​នឹងក្លាយជា​ជម្រើស​របស់លោក ដូណាល់ ត្រាំ និងបន្ទាប់​ពីមានសេចក្ដីរាយការណ៍​ថា លោក ត្រាំ បាន​បដិសេធអ្នក នយោបាយ​ជាច្រើនសម្រាប់​តួនាទីនេះ។

គួរបញ្ជាក់ថា លោកស្រី Kirstjen Nielsen បញ្ចប់​ការសិក្សា​ពីសាលា Georgetown School of Foreign Service និងសាកល​វិទ្យាល័យ University of Virginia Law School ហើយ លោកស្រីធ្លាប់​​បម្រើការងារជាលើក​ដំបូង ជាមន្ត្រីជាន់ខ្ពស់នៃ​គោលនយោបាយច្បាប់​ សម្រាប់រដ្ឋបាល​សន្តិសុខ និងដឹកជញ្ជូន ក្រោមអតីត​ប្រធានាធិបតី​អាមេរិក លោក George W. Bush៕