(វ៉ាស៊ីនតោន)៖ មហន្តរាយភ្លើងឆេះ​ព្រៃដ៏មហាប្រល័យ​នៅភាគខាងជើង នៃរដ្ឋកាលីហ្វរញ៉ា សហរដ្ឋអាមេរិក បានផ្តាច់ជីវិតមនុស្ស​កើនដល់ ​២១នាក់ហើយ។ នេះបើ​តាមការ​ចេញផ្សាយ​ដោយ ទីភ្នាក់ងារព័ត៌មានចិន ស៊ីនហួរ នៅព្រឹក​ថ្ងៃព្រហស្បតិ៍ ទី១២ ខែតុលា ឆ្នាំ២០១៧។

លោក រ៉ប ហ្គីអូដាណូ (Rob Giordano) មន្រ្តីតម្រួតតំបន់ សូណូម៉ា (Sonoma) បានថ្លែង​ឲ្យក្នុងសន្និសីទ​សារព័ត៌មាន​មួយថា ចំនួនមនុស្ស​ស្លាប់ដោយសារ​ភ្លើងឆេះ​ព្រៃ​នៅភាគខាងជើង​រដ្ឋ​កាលីហ្វរញ៉ា អាចនឹងបន្ត​កើនឡើង​ថែមទៀត ស្របពេល​ដែល​អ្នកបាត់ខ្លួន នៅក្នុងតំបន់ Sonoma មានចំនួន​​ដល់ ៥៦០ ហើយនាពេលនេះ។ នៅក្នុង​ចំណោម​អ្នកទាំង ២១នាក់ ដែល​បានបាត់បង់​ជីវិត ក្នុងហេតុការណ៍​ភ្លើងឆេះ​ព្រៃ​ដ៏អាក្រក់នេះ​ នៅពាសពេញ​ភាគខាងជើង​រដ្ឋ ជាពិសេសតំបន់ Sonoma មានចំនួនច្រើន​ជាងគេ ពោលគឺ ១១នាក់។

គួរបញ្ជាក់ថា មកទល់ពេលនេះ​គ្រោះអគ្គីភ័យដ៏​សន្ធោសន្ធៅខាងលើ បានដុតបំផ្លាញ​ផ្ទៃសរុបប្រមាណ ៦៨,៨០០ហិកតា ហើយកំពុងតែ​​បន្តឆេះនៅ​ក្នុងតំបន់ Sonoma, Napa, Mendocino, និង Mendocion ចាប់តាំងពីប៉ុន្មាន​ថ្ងៃមុនមក។ ជាមួយគ្នានេះ ផ្ទះសម្បែងព្រម​ទាំង​សំណង​ផ្សេងៗទៀត​ច្រើនជាង​ ៣,៥០០ខ្នង ក៏ត្រូវបានឆាបឆេះ​ខ្ទេចខ្ទីរ ​ដោយសារ​មហន្តរាយភ្លើងឆេះព្រៃ​នេះផងដែរ៕