(វ៉ាស៊ីនតោន)៖ មកទល់ពេលនេះ​ យ៉ាងហោចណាស់មនុស្ស ១៥នាក់ ហើយ​បានបាត់បង់​ជីវិត និងច្រើនជាង ១៥០នាក់ ត្រូវគេរាយ​ការណ៍​ថា កំពុងបាត់ខ្លួន​ស្របពេលដែលភ្លើងឆេះ​ព្រៃយ៉ាង​សន្ធោសន្ធៅ បានរីករាលដាល​ពាសពេញ​ភាគខាងជើង​​រដ្ឋកាលីហ្វរ​ញ៉ ​ដែលស្ថិតនៅ​ភាគខាងលិច​សហរដ្ឋអាមេរិក។ នេះ​បើ​តាម​​ការ​ចេញ​ផ្សាយ​ដោយ ទីភ្នាក់ងារព័ត៌មានចិន ស៊ីនហួរ នៅព្រឹក​ថ្ងៃពុធ ទី១១ ខែតុលា ឆ្នាំ២០១៧។

បើតាមអាជ្ញាធរ​អាមេរិក ករណីមនុស្សស្លាប់​ខាងលើ បានកើតមានឡើង​នៅក្នុងតំបន់ សូណាម៉ា (Sonama) ០៩នាក់, តំបន់ ណាប៉ា (Napa) ០២នាក់, តំបន់ មិនដូស៊ីណូ (Mendocino) ០៣នាក់, និង តំបន់ យូបាន (Yuba) ម្នាក់ ខណៈមនុស្សលើសពី ១៥០នាក់ផ្សេងទៀត បាននិងកំពុងតែ​បន្តបាត់​ខ្លួន​នៅក្នុងតំបន់ Sonoma។

គួរបញ្ជាក់ថា មនុស្សជាង ៣,០០០នាក់ កំពុងបន្តស្ថិតក្នុង​ទីជម្រកសុវត្ថិភាព​ដដែល ខណៈភ្លើងឆេះ​ព្រៃចំនួន ១៧​កន្លែង ដាច់ដោយឡែក​ពីគ្នា បានឆាបឆេះ​នៅលើផ្ទៃដី​ប្រមាណ ៤៦,៥០០ហិកតា ទូទាំងរដ្ឋ​កាលីហ្វរញ៉ា ហើយ​សំណង់នានា រួមមាន​ទាំង ហាង, មន្ទីរ​​​ពេទ្យ, និង​លំនៅឋាន​យ៉ាងតិច ២,០០០ខ្នង ត្រូវបានបំផ្លិចបំផ្លាញ​ខ្ទេចខ្ទី​រាបដល់ដី តែម្តង៕