(តេហេរ៉ង់)៖​ ការដកខ្លួន​ឯកតោភាគីរបស់​សហរដ្ឋអាមេរិក ចេញពីកិច្ចព្រមពៀង​នុយក្លេអ៊ែរអ៊ីរ៉ង់ នឹងមិនមានន័យ​កិច្ចព្រមព្រៀងនេះ​ត្រូវបញ្ចប់​នោះទេ ខណៈរដ្ឋមួយចំនួន​នៅក្នុង​សហភាពអឺរ៉ុប ដូចជា​បារាំង អាល្លឺម៉ង់ និងអង់គ្លេស មានបំណងចង់​រកស៊ីជាថ្មីជា​មួយអ៊ីរ៉ង់។ នេះបើតាម​អ្នកជំនាញ​អ៊ីរ៉ង់ លោក ម៉ាហាន អាបេឌីន (Mahan Abedin) ដកស្រង់​ដោយ​សារព័ត៌មាន Sputnik នៅព្រឹកថ្ងៃអង្គារ ទី១០ ខែតុលា ឆ្នាំ២០១៧។

ការលើកឡើង​បែបនេះ​របស់ លោក Mahan Abedin​ ធ្វើឡើង​បន្ទាប់ពី​សារព័ត៌មាន​អាមេរិក​រាយការណ៍ថា លោក​ប្រធានាធិបតី ដូណាល់​ ត្រាំ អាចនឹង​ប្រកាសបោះបង់ចោល​ កិច្ចព្រមព្រៀង​នុយក្លេអ៊ែរ​អ៊ីរ៉ង់។ លោក Abedin​ បានបញ្ជាក់​នៅក្នុងបទសម្ភាសន៍​ជាមួយ Sputnik យ៉ាងដូច្នេះថា «បើទោះបីជា​ប្រធានាធិបតី​អាមេរិក លោក ដូណាល់ ត្រាំ មិនផ្ដល់​សុពលភាព ឬក៏ដក​សហរដ្ឋអាមេរិក ចេញពី​កិច្ចព្រមព្រៀង​នេះក៏ដោយ ក៏វានឹង​មិនមានន័យ​ថា កិច្ចព្រមព្រៀង​នេះត្រូវ​បញ្ចប់នោះដែរ ព្រោះបើសិន​ជាលោក​ធ្វើដូច្នោះមែន នោះវាគ្រាន់តែ​មានន័យថា ទីក្រុងវ៉ាស៊ីនតោនសុខចិត្ត នៅខាងក្រៅកិច្ចព្រមព្រៀងតែប៉ុណ្ណោះ។

ចំណែកឯ បារាំង អង់គ្លេស និងអាល្លឺម៉ង់ អាចនឹងព្យាយាមបញ្ចុះ លោក ត្រាំ ឱ្យបន្តស្ថិត​នៅក្នុងកិច្ចព្រមព្រៀង​​នុយក្លេអ៊ែរ​​រវាង​មហាអំណាច ​៥ បូក ១ កាលពី​ឆ្នាំ២០១៥ ត្បិតពួកគេ​សុទ្ធតែ​កំពុងសម្លឹង​ឃើញផលប្រយោជន៍​​ពីការរកស៊ីលើវិស័យ​ថាមពល និងប្រេងជា​មួយទីក្រុង​តេហេរ៉ង់»។

គួរបញ្ជាក់ថា បើតាមកិច្ចព្រមព្រៀងនុយក្លេអ៊ែរអ៊ីរ៉ង់កាលពីឆ្នាំ២០១៥ រដ្ឋបាលអាមេរិក ត្រូវតែត្រួតពិនិត្យ និងផ្ដល់សុពលភាពរៀងរាល់ ៩០ថ្ងៃម្ដង ហើយការផ្ដល់សុពលភាព​នេះនឹងត្រូវផុត កំណត់​នៅថ្ងៃទី១៥ ខែតុលានេះ៕