(ប៊ីសកិក)៖ ឧបនាយករដ្ឋមន្ត្រី របស់ប្រទេសកៀហ្ស៊ីស៊ីស្ថាន លោក តាមៀ ដាហ្ស៊ូម៉ាកាឌីរ៉ូវ (Temir Dzhumakadyrov) បានទទួលមរណភាព នៅក្នុងគ្រោះថ្នាក់ក្រឡាប់​រថយន្ត នៅក្នុងរដ្ឋធានី ប៊ីសកិក នៅព្រឹកថ្ងៃសៅរ៍នេះតែម្តង។ នេះបើតាម​ការចេញផ្សាយដោយ ទីភ្នាក់ងារ​ព័ត៌មាន Sputnik នារសៀលថ្ងៃសៅរ៍ ទី០៧ ខែតុលា ឆ្នាំ២០១៧។

អ្នកនាំពាក្យ​រដ្ឋាភិបាល កៀហ្ស៊ីស៊ីស្ថាន បានប្រាប់ភ្នាក់ងារ​ព័ត៌មានរុស្ស៊ី​ខាងលើនេះ យ៉ាងដូច្នេះថា «គ្រោះថ្នាក់ចរាចរណ៍​ខាងលើនេះ បានកើតឡើងកាលពីវេលាម៉ោង ៧៖៣០នាទីព្រឹក នៅក្បែរភូមិ សាដូវ៉ូយេ នៃសង្កាត់ម៉ូស្គូ របស់រដ្ឋធានីប៊ីសកិកតែម្តង ដោយរថយន្ត​របស់លោកឧបនាយករដ្ឋមន្ត្រី​ខាងលើនេះជិះ គឺជាប្រភេទ Toyota Land Cruiser»។

សម្រាប់នៅក្នុង​រថយន្តនោះ គឺមិនមែនមានតែ​លោកឧបនាយករដ្ឋមន្ត្រី​ម្នាក់ឯងនោះឡើយ ពោលគឺវារួមមាន​ទាំងតៃកុងឡានម្នាក់ និងជំនួយការរបស់លោកម្នាក់ទៀត ក៏បានបាត់បង់ជីវិតដូចគ្នា។ គួរបញ្ជាក់ថា ឧបនាយករដ្ឋមន្ត្រីវ័យ ៤០ឆ្នាំ លោក តាមៀ ដាហ្ស៊ូម៉ាកាឌីរ៉ូវ បានឡើងកាន់តំណែង នេះតាំងតែពីខែសីហា ឆ្នាំ២០១៦មកម្ល៉េះ។ សម្រាប់មូលហេតុដែលបានបង្កជាគ្រោះថ្នាក់ចរាចរណ៍នេះឡើង នៅមិនទាន់មានការបញ្ជាក់នោះឡើយ៕