(អាមេរិក)៖ អភិបាលកោះ ភើតូរីកូ (Puerto Rico) បានឲ្យដឹងនា​ថ្ងៃពុធនេះថា តួលេខផ្លូវការ​នៃចំនួនមនុស្ស​បាត់បង់ជីវិត​ដោយសារតែមហន្តរាយ​​​ បង្កឡើងដោយខ្យល់ព្យុះ ហឺរីខិន ម៉ារៀ (Hurricane Maria) បានកើនឡើង​ដល់ ៣៤នាក់។ នេះបើតាមការ​ចេញផ្សាយ​ដោយ សារព័ត៌មាន New York Post នៅព្រឹក​​ថ្ងៃ​ពុធ ទី០៤ ខែតុលា ឆ្នាំ២០១៧។

អភិបាល​កោះ Puerter Roco លោក រីខាដូ រ៉ូស្សែលឡូ (Ricardo Rossello) ក៏បានបញ្ជាក់ដែរថា ទំហំនៃការបំផ្លិចបំផ្លាញ​ បណ្តាលមកពីគ្រោះ​ធម្មជាតិនេះ នៅទូទាំងដែនដីកោះ​ក្នុងតំបន់​ការីបៀន គឺមានទំហំជាទឹកប្រាក់យ៉ាងតិច ៩០ពាន់លានដុល្លារ ឯណោះ។ លោក Rossello បានធ្វើសេចក្តី​ប្រកាស​នេះ នៅ​ក្នុងអំឡុង​សន្និសីទ​សារព័ត៌មាន​មួយ ធ្វើឡើងក្រោយ​ពីដំណើរទស្សនកិច្ច​រយៈពេលខ្លី របស់ប្រធានាធិបតី​អាមេរិក លោក ដូណាល់ ត្រាំ មកកាន់តំបន់​រដ្ឋបាល​មួយនេះ ដើម្បីវាយតម្លៃ​ទៅលើការរងផលប៉ះពាល់​ នៃព្យុះកំណាចនេះ។

គួរបញ្ជាក់ថា ក្នុងដំណើរ​ទស្សនកិច្ចនេះ លោក ដូណាល់ ត្រាំ ក៏បានឆ្លៀត​ឱកាសផ្តល់ជាកម្លាំងចិត្ត ដល់ពលរដ្ឋអាមេរិក​នៅទីនោះផង​ដែរ ខណៈព្យុះ Hurricane Maria នេះ គឺជាព្យុះ Hurricane ដ៏អាក្រក់បំផុត ដែលបានវាយប្រហារ​មកលើកោះ Puerto Rico ក្នុងអំឡុង​ពេលជាង ៩០ឆ្នាំមកនេះ៕