(ដាម៉ាស់)៖ ប្រជាជនស្លូតត្រង់យ៉ាងតិច៤៥នាក់បានស្លាប់ ដោយសារការវាយប្រហារតាមផ្លូវអាកាស របស់សហរដ្ឋអាមេរិក ទៅ​លើ​តំបន់គ្រប់គ្រងដោយ​ក្រុមសកម្មប្រយុទ្ធ ISIS នៅទីក្រុង Raqqa ភាគខាងជើងប្រទេសស៊ីរី។ នេះបើតាមការចេញផ្សាយដោយទីភ្នាក់​ងារ​ព័ត៌មានចិន ស៊ីនហួរ នៅព្រឹកថ្ងៃពុធ ទី០៤ ខែតុលា ឆ្នាំ២០១៧។

សារព័ត៌មានស៊ីរី al-Watan បានធ្វើសេចក្តីរាយការណ៍ថា កុមារនិងស្រ្តីភេទ បានស្ថិតនៅក្នុងចំណោម អ្នកដែលបានបាត់បង់ជីវិត នៅ​ក្នុងប្រតិបត្តិការទម្លាក់គ្រាប់ ធ្វើឡើងដោយក្រុមចំរុះអន្តរជាតិ ដឹកនាំដោយសហរដ្ឋអាមេរិក ដែលបានវាយប្រហារ ទៅលើលំនៅឋាន​ចំនួន០២ខ្នង ក្នុងតំបន់ Tawasoiyeh ភាគខាងជើងក្រុង Raqqa។

គួរបញ្ជាក់ថា នាពេលថ្មីៗនេះ កងកម្លាំងចំរុះដឹកនាំដោយអាមេរិក បានបង្កើនសកម្មភាពប្រតិបត្តិការ តាមផ្លូវអាកាសរបស់ខ្លួនជាខ្លាំង ក្នុងគោលបំណងសំដៅ រួមគ្នាជាមួយនិងកងកម្លាំងប្រជាធិតេយ្យស៊ីរី (SDF) ដែលដឹកនាំដោយឃើដ ដណ្តើមកាន់កាប់ទីក្រុង Raqqa ពីការគ្រប់គ្រងរបស់ ISIS យកមកវិញ។ ដោយឡែក ដោយសារតែការទម្លាក់គ្រាប់បែកឥតឈប់ឈររបស់ពួកគេ ចំនួនជនស៊ីវិលដែល​បានស្លាប់ បានកើនឡើងស្ទើរតែរៀងរាល់ថ្ងៃ៕