(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់​ ត្រាំ បានទទួលរង​ការរិះគន់យ៉ាង​ខ្លាំង​ នៅលើបណ្ដាញទំនាក់ទំនង​សង្គមជុំវិញ​ប្រតិកម្មស្ដង់ដាពីរ របស់លោក​ទៅនឹងការបាញ់ប្រហារ​ដ៏អាក្រក់ បំផុតមួយ​នៅក្នុងប្រវត្តិសាស្ត្រ​អាមេរិក​កាលពី​ថ្ងៃអាទិត្យ។ ការបាញ់​ប្រហារនេះ បានផ្ដាច់យក​អាយុជីវិត​មនុស្ស ៥៩នាក់ និង ៥២៧នាក់ផ្សេងទៀតរងរបួស នៅទីក្រុង ឡាស វេហ្គាស់ (Las Vegas) នៃរដ្ឋណេវ៉ាដា (Nevada)។ នេះបើតាម​ការចេញផ្សាយ​ដោយ សារព័ត៌មាន Al Jazeera នៅព្រឹកថ្ងៃអង្គារ ទី០៣ ខែតុលា ឆ្នាំ២០១៧។

យោងតាមប៉ូលិស​អាមេរិក ខ្មាន់កាំភ្លើងឈ្មោះ ស្ទេហ្វិន ផេកដក់ (Stephen Paddock) មានអាយុ ៦៤ឆ្នាំ បានធ្វើសកម្មភាព​​បាញ់ប្រហារ​ ទៅលើហ្វូង​​មនុស្សម្នាយ៉ាងច្រើន​កុះករ​ជាង ២២,០០០នាក់ ដែលកំពុង​​ចូលរួមក្នុង​ថ្ងៃ​ចុងក្រោយ នៃព្រឹត្តិការណ៍​ប្រគុំ​តន្រ្តីកណ្តាល​​វាលដ៏ធំមួយ ចេញ​ពី​បន្ទប់ជាន់ទី ៣២ របស់លោកនៃសណ្ឋាគារ-កាស៊ីណូ ម៉ាន់ដាឡាយ បេយ (Mandalay Bay)។ ក្រោយមក​ជនដៃដល់រូបនេះ ត្រូវប៉ូលិសអាមេរិក​​រកឃើញថា ត្រូវបានស្លាប់នៅ​ក្នុង​បន្ទប់នោះ រួមជាមួយ​និងកាំភ្លើង​ចំនួន ១០ដើម ហើយប៉ុន្មានម៉ោង​បន្ទាប់ ក្រុម ISIS បានចេញមុខ​អះអាងទទួល​ខុសត្រូវ ដោយ​អះអាងថា Paddock ជាអ្នកប្រយុទ្ធ​របស់ខ្លួន តែទីភ្នាក់ងារ FBI បានច្រានចោល​ការអះអាង​នេះ។

ចំណែកឯ​ប្រធានាធិបតី​អាមេរិក លោក ដូណាល់ ត្រាំ ក៏បានចូលរួម​រំលែកមរណៈ​ទុក្ខ ដល់ជនរងគ្រោះ និងថ្កោលទោស​យ៉ាងខ្លាំង​ផងដែរ លើការវាយប្រហារនេះដោយលោក​ហៅវាថា «ជាសកម្មភាព​របស់បិសាច»។ យ៉ាងណា​ក៏ដោយ អ្នកលេងបណ្ដាញ​ទំនាក់ទំនង​សង្គម​មួយចំនួន បែរជារិះគន់លោក ត្រាំ ថាបានបញ្ចេញប្រតិកម្ម​យឺតយ៉ាវ ពោលគឺមាន​គណនីខ្លះសរសេរ​នៅលើ Twitter យ៉ាងដូច្នេះថា «ដូណាល់ ត្រាំ ឆ្លើយតបទៅនឹង​ការវាយប្រហារ​នៅឯស្ពាន London Bridge ក្នុងរយៈពេល ២ម៉ោង, Parsons Green ៣ម៉ោង។ តែនៅ Las Vegas វិញគឺរហូតដល់ទៅជាង ៥ម៉ោង ទើបគាត់ចេញមុខ​ប្រតិកម្ម»។

គួរបញ្ជាក់ថា អាជ្ញាធរអាមេរិក​មិន​ទាន់អាចស្វែង​​រកឃើញ មូលហេតុ​នៃ​ការបាញ់រះ​ទៅលើហ្វូង​មនុស្ស​យ៉ាង​អាក្រក់នេះ​​នៅឡើយទេ ក៏​ប៉ុន្តែពួកគេ​​ជឿជាក់ថា លោក Paddock បានធ្វើ​សកម្មភាព​ទាំងអស់​តែម្នាក់ឯង​ប៉ុណ្ណោះ។ យ៉ាងមិញ ប៉ូលិសតម្រួត​​នៃទីក្រុង Las Vegas លោក ចូ ឡាំបាដូ (Joe Lambardo) បានឲ្យ​ដឹងថា ស្រ្តីម្នាក់​ផ្សេង​ទៀត ដែលមាន​ទំនាក់ទំនង​​នឹងខ្មាន់កាំភ្លើង ក៏នឹងត្រូវ​បានប្រឈមមុខ​នឹង​ការស៊ើប​អង្កេត ក៏ដូចជាសាក​​សួរផងដែរ​នៅ​ពេលស្រ្តីរូបនេះ វិលត្រឡប់មក​សហរដ្ឋអាមេរិក៕