(ម៉ាឌ្រីត)៖ ទោះបីជាមេដឹកនាំតំបន់ កាតាឡាន (Catalonia) លោក ខាឡេស ភីកដឺម៉ុន អះអាងថា តំបន់របស់លោក មានសិទ្ធិគ្រប់គ្រាន់ក្នុងការប្រកាសឯករាជ្យ តបតាមលទ្ធផលនៃការបោះឆ្នោតធ្វើប្រជាមតិក៏ដោយ ក៏នាយករដ្ឋមន្ត្រីអេស្ប៉ាញ នាយករដ្ឋមន្ត្រីអេស្ប៉ាញ លោក ម៉ារីយ៉ាណូ រ៉ាចយ (Mariano Rajoy) បានប្រកាសយ៉ាងឱឡារឹកតាមកញ្ចក់ទូរទស្សន៍ តាំងពីថ្ងៃអាទិត្យមកម្ល៉េះថា គ្មានទេឯករាជ្យភាពសម្រាប់តំបន់ កាតាឡាន (Catalonia) ហើយរដ្ឋាភិបាលមានសិទ្ធិនៅក្នុងការបង្ក្រាបបាតុកម្ម ដូចដែលបានកើតឡើងកន្លង ដែលបានបណ្តាលឲ្យមនុស្ស ៨៤៤នាក់ រងរបួសធ្ងន់-ស្រាល។ នេះបើតាមការបូកសរុបព័ត៌មាន នាយប់ថ្ងៃចន្ទ ទី០២ ខែតុលា ឆ្នាំ២០១៧។
លោកនាយករដ្ឋមន្ត្រីអេស្ប៉ាញ បានសង្កត់ធ្ងន់យ៉ាងដូច្នេះថា «ថ្ងៃនេះគឺមិនមានការរៀបចំបោះឆ្នោតប្រជាមតិអ្វី តាមតែអំពើចិត្តខ្លួនឯងនោះឡើយ។ ប្រទេសរបស់យើង កំពុងអនុវត្តន៍សកម្មភាព និងចំណាត់ការគ្រាប់បែបយ៉ាង ជាមួយនិងកម្លាំងពេញលេញ ដើម្បីប្រឆាំងរាល់ការបង្កហេតុទាំងអស់។» លោក រ៉ាចយ ក៏បានការពារសេចក្តីសម្រេចរបស់លោក ក្នុងការបញ្ជូនកម្លាំងប៉ូលិស ទៅបង្ក្រាបសកម្មភាពធ្វើការបោះឆ្នោតប្រជាមតិនៅតំបន់ កាតាឡាន ផងដែរ។
នាយករដ្ឋមន្ត្រីខាងលើនេះ ក៏បានបញ្ជាក់បន្ថែមទៀតថា «កាតព្វកិច្ចទី១របស់ខ្ញុំ គឺគោរពច្បាប់ ហើយនិងធានាថា ច្បាប់ត្រូវតែទទួលបានការគោរព។ កងកម្លាំងសន្តិសុខ បានចាត់វិធានការយ៉ាងម៉ឺងម៉ាត់ ដើម្បីបញ្ឈប់ការធ្វើប្រជាមតិនៅកាតាឡាន»។ សម្រាប់មនុស្សស្លាប់វិញ គឺពុំមានរបាយការណ៍បញ្ជាក់ថាមាននោះឡើយ ខណៈក្នុងចំណោមអ្នករងរបួសទាំង ៨៤៤នាក់ មាន ៣៣នាក់ជាមន្ត្រីប៉ូលិស។
ជុំវិញការបោះឆ្នោតដ៏ចម្រូងម្រាសនេះដែរ អាជ្ញាធរ Catalonia បានអះអាងថា ៩០ភាគរយ នៃប្រជាជនច្រើនជាង ២.២៦លាននាក់ ដែលបានចូលរួមក្នុងការបោះឆ្នោតប្រជាមតិរបស់តំបន់ Catalonia កាលពីថ្ងៃអាទិត្យ បានបោះឆ្នោតគំាទ្រការប្រកាសឯករាជ្យ ខណៈអ្នកដែឡបានចុះឈ្មោះបោះឆ្នោតពីដំបូង មានរហូតដល់ទៅ ៥.៣លាននាក់ឯណោះ ហើយមេដឹកនាំតំបន់មួយនេះ គឺលោក ខាឡែស ភីកដឺម៉ុន (Carles Puigdemont) ក៏បានសន្យាដែរថា នឹងប្រកាសឯករាជ្យឯកភាគី បើទោះបីជាមានការជំទាស់ពីសំណាក់ រដ្ឋាភិបាលទីក្រុងម៉ាឌ្រីតក៏ដោយ ព្រោះខ្លួនទទួលសិទ្ធិបង្កើតរដ្ឋហើយ។
គួរបញ្ជាក់ថា កាលពីថ្ងៃអាទិត្យ រដ្ឋាភិបាល Catalonia បានដំណើរការរៀបចំការបោះឆ្នោតប្រកាសឯករាជ្យពីប្រទេសអេស្ប៉ាញ ដែលជំទាស់យ៉ាងខ្លាំងនឹងការបោះឆ្នោតនេះដោយចាត់ទុកថា «វាគឺរឿងខុសច្បាប់»។ ដូច្នេះហើយទើប កាលពីថ្ងៃម្សិលមិញ អាជ្ញាធរអេស្ប៉ាញ បានចាត់វិធានការក្ដៅបិទការិយាល័យបោះឆ្នោត និងបានប្រើអំពើហិង្សាលើក្រុមអ្នកគាំទ្រការបោះឆ្នោតនេះ បង្កឱ្យមានអ្នករងរបួស ៨៤៤នាក់។ ក៏ប៉ុន្តែអាជ្ញាធរ Catalonia បានអះអាងថា ៩៦ភាគរយ នៃការិយាល័យបោះឆ្នោត នៅតែអាចដំណើរសម្រាប់ការបោះឆ្នោតដដែល ខណៈពួកគេបានស្នើឱ្យ សហភាពអឺរ៉ុបឆ្លើយតបនឹងការរំលោភសិទ្ធិមនុស្ស នៅអំឡុងការបោះឆ្នោតប្រជាមតិ។
ងាកមកកាន់សហភាពអឺរ៉ុបវិញ ហាក់មិនទាន់បានបង្ហាញជំហរអ្វីដុំកំភួន ក្នុងការដោះស្រាយវិបត្តិដ៏បង្ហូរឈាមនៅអេស្ប៉ាញនោះឡើយ ប៉ុន្តែអ្នកនយោបាយជាន់ខ្ពស់អឺរ៉ុប ក្នុងនោះរួមមានទាំងតំណាងរាស្ត្រសភាអឺរ៉ុប បានថ្កោលទោសយ៉ាងខ្លាំងចំពោះប៉ូលិសអេស្ប៉ាញ សម្រាប់ការប្រើប្រាស់កម្លាំងដោយហិង្សា ប្រឆាំងនឹងហ្វូងអ្នកបោះឆ្នោតប្រជាមតិប្រកាសឯរាជ្យរបស់តំបន់ Catalonia ខណៈសហភាពអឺរ៉ុប និងគណៈកម្មការអឺរ៉ុប មិនទាន់បញ្ចេញប្រតិកម្មអ្វីជាដុំកុំភួននៅឡើយទេ។
ថ្លែងនៅក្នុងសេចក្ដីថ្លែងការណ៍របស់ខ្លួននៅថ្ងៃចន្ទនេះ ក្រុមតំណាងរាស្ត្រអឺរ៉ុបបានលើកឡើងយ៉ាងដូច្នេះថា «យើងកំពុងតាមដានការវិវឌ្ឍន៍ស្ថានភាពនៅក្នុងតំបន់ Catalonia ជាមួយក្ដីព្រួយបារម្ភយ៉ាងខ្លាំង ទាក់ទិននឹងការប្រើប្រាស់អំពើហិង្សា ដោយប៉ូលិសប្រឆាំងនឹងអ្នកបោះឆ្នោតដោយសន្តិវិធី ហើយដែលនេះគឺជាកំហុសមួយរបស់រដ្ឋាភិបាលទីក្រុងម៉ាឌ្រីត... ដូច្នេះគណៈកម្មការអឺរ៉ុបមិនអាចបន្ត បិទភ្នែកចំពោះស្ថានភាពក្នុងតំបន់ Catalonia ហើយយើងជំរុញឱ្យគណៈកម្មការអឺរ៉ុប លើកកម្ពស់កិច្ចសន្ទនានិងធ្វើជាអ្នកសម្របសម្រួល»។
សម្រាប់ព័ត៌មានចុងក្រោយនេះ រដ្ឋមន្ត្រីយុត្តិធម៌អេស្ប៉ាញបានព្រមានថា ការរឹងទទឹងនៅចង់ទាមទារឯករាជ្យភាពនោះ នឹងនាំឲ្យមាត្រា ១៥៥ នៃរដ្ឋធម្មនុញ្ញជាតិត្រូវរំលោភបំពាន ហើយវានឹងបង្ខំឲ្យរដ្ឋាភិបាលទីក្រុងម៉ាឌ្រីត ចូលធ្វើអន្តរាគមន៍តំបន់ស្វយ័ត កាតាឡាន តែម្តងព្រោះគ្មាននរណាម្នាក់អាចប្រកាសឯករាជ្យ នៅក្នុងដែនអធិបតេយ្យភាពរបស់អេស្ប៉ាញបានឡើយ៕
https://cdn.rt.com/files/2017.10/thumbnail/59d0d1c0fc7e9393388b4567.JPG
