​(ម៉ាឌ្រីត)៖ រដ្ឋមន្ត្រីការ​បរទេស​អេស្ប៉ាញ លោក អាល់ហ្វុនសូ ដាស្ទីស (Alfonso Dastis) បានចេញមុខ​ការពារចំណាត់​ការរបស់ប៉ូលិសជាតិ​អេស្ប៉ាញ ក្នុងការបង្រ្កាប​យ៉ាងហិង្សា​ទៅលើក្រុមអ្នក​គាំទ្រ ការប្រកាស​ឯករាជ្យរបស់​តំបន់ កាតាឡូនៀ (Catalonia) នៅអំឡុងការបោះឆ្នោត​ប្រជាមិត​មួយ កាលពីថ្ងៃអាទិត្យ ខណៈអ្នករង​របួសបានកើន​ច្រើនជាង ៨៤៤នាក់ និង​រដ្ឋាភិបាល Catalonia កំពុងស្នើ​ឱ្យសហភាព អឺរ៉ុបហើបមាត់​និយាយពី​ការរំលោភសិទ្ធិ​មនុស្សនេះ។ នេះបើតាម​ការចេញផ្សាយ​ដោយ សារព័ត៌មាន Russian Today នៅព្រឹកថ្ងៃចន្ទ ទី០២ ខែតុលា ឆ្នាំ២០១៧។

ថ្លែងប្រាប់​សារព័ត៌មាន Sky News លោក Alfonso Dastis បានលើក​ឡើងយ៉ាងដូច្នេះថា «អ្នកអាចគិតថា ក្រុមមនុស្ស​ទាំងនោះ​កំពុងអនុវត្តន៍សិទ្ធិ​ដោយសន្តិវិធី ក្នុងការបោះឆ្នោត ក៏ប៉ុន្តែបញ្ហាការ បោះឆ្នោត​ប្រជាមតិនោះ ត្រូវបានចាត់ទុកថា ជារឿងខុសច្បាប់ដោយ​តុលាការធម្មនុញ្ញ... ដូច្នេះខ្ញុំមិន​យល់ស្រប​ឡើយថា (ចំណាត់ការ​របស់ប៉ូលិស) គឺជាអំពើហិង្សាធ្ងន់ធ្ងរ​ហួសប្រមាណ»។

គួរបញ្ជាក់ថា បើតាម​អាជ្ញាធរ Catalonia ៩០ភាគរយ នៃប្រជាជន​ច្រើនជាង ២.២៦លាននាក់ ដែលបានចូល​រួមក្នុងការបោះឆ្នោត​ប្រជាមតិរបស់តំបន់ Catalonia បានបោះឆ្នោតគំាទ្រប្រកាស ឯករាជ្យ រីឯមេដឹកនាំ​តំបន់មួយនេះ លោក កាឡែស ភីកឌេម៉ុន (Carles Puigdemont) ក៏បានសន្យាដែរថា នឹងប្រកាសឯករាជ្យជាឯកភាគី បើទោះជា​មានការជំទាស់​ពី​សំណាក់រដ្ឋាភិបាល​ទីក្រុងម៉ាឌ្រីត ក៏ដោយ ព្រោះខ្លួនទទួល​សិទ្ធិបង្កើត​រដ្ឋហើយ៕