(សេអ៊ូល)៖ ធ្លាប់តែដើរត្រួតពិនិត្យមើលការបាញ់សាកល្បងមីស៊ីល និងកម្លាំងយោធា នៅពេលនេះមេដឹកនាំកូរ៉េខាងជើង លោក គីម ជុងអ៊ុន បានងាកមកធ្វើទស្សនកិច្ចទៅកាន់កសិដ្ឋាន ដំាបន្លែមួយកន្លែងយ៉ាងរំភើយ ខណៈទីក្រុងសេអ៊ូលកំពុងព្រួយបារម្ភខ្លាចក្រែង ទីក្រុងព្យុងយ៉ាង ធ្វើតេស្ដមីស៊ីលឆ្លងទ្វីប ឬក៏អាវុធនុយក្លេអ៊ែរ សាជាថ្មីនៅខែតុលាខាងមុខនេះ។ នេះបើតាម សារព័ត៌មានរដ្ឋកូរ៉េខាងជើង KCNA ដកស្រង់ដោយ ទីភ្នាក់ងារសារព័ត៌មាន យ៉ុនហាប់ នៅរសៀលថ្ងៃសៅរ៍ ទី៣០ ខែកញ្ញា ឆ្នាំ២០១៧។
យោងតាម KCNA លោក គីម ជុងអ៊ុន បានបំពេញដំណើរទស្សនកិច្ច ទៅកាន់កសិដ្ឋានលេខ ១១១៦ ដែលស្ថិតនៅក្រោមការគ្រប់គ្រងដោយអង្គភាព KPA 180។ ជាងនេះទៅទៀត នាឱកាសបំពេញទស្សនកិច្ចនោះដែរ លោក គីម បានអំពាវនាវឱ្យមានការចាប់អារម្មណ៍កាន់តែខ្លាំង លើកិច្ចខិតខំប្រឹងប្រែងអភិវឌ្ឍន៍បន្លែថ្មីៗ ដែលផលិតបានទិន្នផលខ្ពស់បំផុត ក៏ដូចជាការប្រើប្រាស់គ្រាប់ពូជមានគុណភាពល្អ នៅទូទាំងប្រទេស។ KCNA បានបន្ថែមថា ដំណើរទស្សនកិច្ចរបស់ លោក គីម ធ្វើឡើងកាលពីដើមខែកញ្ញាកន្លងទៅ ពោលគឺក្រោយពេលលោកបញ្ជាឱ្យ បង្កើតវិទ្យាសា្ថនបចេ្ចសទេសខាងកសិកម្មមួយឡើង។
គួរបញ្ជាក់ថា បើតាមប្រព័ន្ធផ្សព្វផ្សាយកូរ៉េខាងត្បូង កូរ៉េខាងជើងបានដឹកជញ្ជូនមីស៊ីលជាច្រើនចេញពីឃ្លាំងមីស៊ីលមួយកន្លែង ក្នុងទីក្រុងព្យុងយ៉ាង ហើយពួកគេរំពឹងថា របបកម្មុយនីស្ដនេះ នឹងបង្ករឿងសាជាថ្មីនៅអំឡុងខែតុលាខាងមុខ៕
.
