(បាងកក)៖ អតីតនាយករដ្ឋមន្រ្តីថៃ លោកស្រី យីងឡាក់ ស៊ីណាវ៉ាត់ ត្រូវគេអះអាងថា កំពុងស្ថិតនៅក្នុងទីក្រុងឡុងដ៍ ដើម្បីស្វែងរកសិទ្ធិជ្រកកោណនៅចក្រភពអង់គ្លេស បន្ទាប់ពីតុលាការកំពូលថៃនាសប្តាហ៍នេះ បានសម្រេចប្រកាសផ្តន្ទាទោសរូបលោកស្រី ដាក់ពន្ធនាគាររយៈពេល ០៥ឆ្នាំ ជុំវិញសំណុំរឿងគោលនយោបាយ ជួយទិញស្រូវអង្ករពីប្រជាកសិករថៃ ដែលបានធ្វើឲ្យខាតបង់ថវិការដ្ឋយ៉ាងច្រើនសន្ធឹកសន្ធាប់ កាលពីអាណត្តិកាន់អំណាចរបស់លោកស្រី។ នេះបើតាមការចេញផ្សាយដោយសារព័ត៌មាន CNN នៅព្រឹកថ្ងៃសុក្រ ទី២៩ ខែកញ្ញា ឆ្នាំ២០១៧ ដែលទទួលបានប្រភពពីមន្ត្រី នៅក្នុងគណបក្ស Pheu Thai របស់លោកស្រី។
កាលពីថ្ងៃពុធសប្តាហ៍នេះ តុលាការកំពូលនៃប្រទេសថៃ បានសម្រេចកាត់ទោសលោកស្រី យីកឡាក់ ដោយកំបាំងមុខ ជុំវិញសំណុំរឿងដ៏ចម្រូងចម្រាស ដែលបានធ្វើឲ្យប្រជាជាតិអាស៊ីគ្នេយ៍នេះ ខាតបង់ថវិកាជាង ០៨ពាន់លានដុល្លារ ឲ្យជាប់ពន្ធនាគារសម្រាប់រយៈពេល ០៥ឆ្នាំ ខណៈអតីតនាយករដ្ឋមន្រ្តីរូបនេះ បានរត់គេចខ្លួនចេញទៅក្រៅប្រទេស តាំងតែពីមុនថ្ងៃគ្រោងប្រកាសសាលក្រមជាលើកដំបូងទៅទៀត កាលពីខែសីហាកន្លងទៅ។
ជុំវិញបញ្ហាទីតាំងស្ថិតនៅពិតប្រាកដ នាពេលបច្ចុប្បន្នរបស់ លោកស្រី យីងឡាក់ ស៊ីណាវ៉ាត់ នាយករដ្ឋមន្រ្តីថៃលោក ប្រាយុទ្ធ ចាន់អូចា បានឲ្យដឹងកាលពីថ្ងៃព្រហស្បតិ៍ថា លោកស្រី យីងឡាក់ កំពុងសំងំលាក់ខ្លួន នៅក្នុងទីក្រុងឌូបៃ នៃប្រទេសអេមីរ៉ាត់អារ៉ាប់រួម ជាទីដែលបងប្រុសបង្កើតរបស់លោកស្រី គឺលោក ថាក់ស៊ីន ស៊ីណាវ៉ាត់ ដែលធ្លាប់ធ្វើជាមេដឹកនាំថៃមួយរូបដែរនោះ កំពុងរស់នៅដោយនិរទេសខ្លួន។ ដោយឡែកនាថ្ងៃសុក្រនេះ ប្រភពពីមន្រ្តីនៅបក្សភឿថៃ បានប្រាប់ CNN ថា លោកស្រី យីងឡាក់ បានចាកចេញពីឌូបៃ ទៅកាន់ទីក្រុងឡុងដ៍ តាំងពី០២សប្តាហ៍មុនម្ល៉េះ។
គួរបញ្ជាក់ថា នៅក្នុងបទសម្ភាសន៍មួយ ធ្វើឡើងកាលពីឆ្នាំ២០១៦ លោកស្រី យីងឡាក់ ធ្លាប់បានសន្យាយ៉ាងមុតមាំថា នឹងនៅប្រឈមមុខជាមួយរឿងក្តីរបស់លោកស្រី តាំងពីដើមរហូតដល់ទីបញ្ចប់ ដោយលោកស្រី មិនដែលគិតថា នឹងរត់ភៀសខ្លួនចាកចេញពីប្រទេសកំណើតរបស់លោកស្រីនោះឡើយ៕
