(វ៉ាស៊ីនតោន)៖ បិតាស្ថាបនិកទស្សនាវដ្តីស្រើបស្រាល «Play boy» ដ៏ល្បីល្បាញរបស់សហរដ្ឋអាមេរិក លោក ហាហ្គ ហេហ្វណឺ (Hugh Hefner) បានទទួលមរណភាពហើយ ក្នុងវ័យ ៩១ឆ្នាំ។ នេះបើតាមការចេញផ្សាយដោយ សារព័ត៌មាន CNN នៅរសៀលថ្ងៃព្រហស្បតិ៍ ទី២៨ ខែកញ្ញា ឆ្នាំ២០១៧។
សហគ្រាស Play boy បានចេញសេចក្តីថ្លែងការណ៍ឲ្យដឹងថា បិតាស្ថាបនិក Play boy លោក Hugh Hefner បានទទួលមរណភាពដោយជរាពាធ នាវេលាយប់ថ្ងៃពុធសប្តាហ៍នេះ (ម៉ោងនៅវ៉ាស៊ីនតោន) ក្នុងវ័យ ៩១ឆ្នាំ ក្រោមវត្តមាននៃសមាជិកក្រុមគ្រួសាររបស់លោក។
គួរបញ្ជាក់ថា លោក Hefner បានបង្កើត Play boy កាលពីឆ្នាំ១៩៥៣ ជាមួយទុនផ្ទាល់ខ្លួនរបស់លោកត្រឹម ៦០០ដុល្លារប៉ុណ្ណោះ ហើយរូបលោក បានកសាងកេរ្តិ៍ឈ្មោះទស្សនាវដ្តីនេះ ឲ្យល្បីរន្ទឺក្លាយទៅជាអាណាចក្រវិស័យកម្សាន្ត ដែលមានតម្លៃរាប់សិបលានដុល្លារ ហើយសម័យកាលដែលល្បីល្បាញកប់បំផុត សម្រាប់ទស្សនាវដ្តីនេះ គឺកាលពីអំឡុងទសវត្សរ៍ឆ្នាំ១៩៧០ ស្របទៅនឹងវិស័យភាពយន្ត ដែលកំពុងតែរីកដុះដាលខ្លាំងដូចគ្នា៕
