(បាងកក)៖ តុលាការកំពូលថៃត្រូវបានគេរំពឹងថា នឹងចេញសាលក្រមសម្រេចនៅថ្ងៃពុធនេះ ពាក់ព័ន្ធនឹងសំណុំរឿងរបស់អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ (Yingluck Shinawatra) ដែលបានរត់ភៀសខ្លួនទៅកាន់បរទេសកាលពីខែមុន ដោយសារភ័យខ្លាចត្រូវផ្ដន្ទាទោសឱ្យជាប់ពន្ធនាគារ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃពុធ ទី២៧ ខែកញ្ញា ឆ្នាំ២០១៧។
លោកស្រី Yingluck ដែលត្រូវបានរដ្ឋាភិបាលយោធាថៃសព្វថ្ងៃ ធ្វើរដ្ឋប្រហារទម្លាក់ពីអំណាចកាលពីឆ្នាំ២០១៤ អាចនឹងត្រូវប្រឈមមុខនឹងការកាត់ទោសជាប់ពន្ធនាគារ ១០ឆ្នាំ បើសិនជា តុលាការរកឃើញថា លោកស្រីពិតជាបានប្រព្រឹត្តកំហុសដូចការចោទប្រកាន់ថា បានធ្វេសប្រហែសធ្វើឱ្យខាតបង់ថវិការដ្ឋជាង ៨ពាន់លានដុល្លារ នៅក្នុងក្របខណ្ឌនៃកម្មវិធីទិញស្រូវ ក្នុងតម្លៃថ្លៃពីកសិករ។
កម្មវិធីទិញស្រូវនេះ ជាគោលនយោបាយដ៏មានប្រជាប្រិយភាពបំផុត ដែលបានជួយឱ្យលោកស្រីជាប់ឆ្នោតជានាយករដ្ឋមន្ត្រីថៃ កាលពី២០១១។ តែយ៉ាងណាក៏ដោយ លោកស្រី Yingluck ធ្លាប់បានអះអាងថា លោកស្រីគ្មានទោសអ្វីទាំងអស់ ហើយថែមទាំងចោទប្រកាន់ដែរថា វាគ្រាន់តែជាការធ្វើទុក្ខបុកម្នេញផ្នែកនយោបាយប៉ុណ្ណោះ។
គួរបញ្ជាក់ថា តុលាការកំពូលថៃ ធ្លាប់គ្រោងប្រកាសសាលក្រមកាលពីថ្ងៃទី២៥ ខែសីហា ម្ដងរួចមកហើយ ក៏ប៉ុន្តែត្រូវបានលើកពេលក្រោយទទួលបានដំណឹងថា លោកស្រី Yingluck Shinawatra មិនបានបង្ហាញខ្លួននៅក្នុងសវនាការ និងរត់ភៀសខ្លួនទៅក្រៅប្រទេស៕
