(ពិភពលោក)៖ នៅថ្ងៃអង្គារ ទី២៦ ខែកញ្ញា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោក ដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ កងអង្គរក្សមេដឹកនាំហ្វីលីពីន (PSG) បានបញ្ជាក់ឲ្យដឹងថា មន្រ្តី PSG ម្នាក់បានបាត់បង់ជីវិត ក្រោយមានហេតុការណ៍បាញ់ប្រហារមួយ នៅក្នុងសួនច្បារក្បែរបរិវេណនៃវិមាន ប្រធានាធិបតីហ្វីលីពីន កាលពីព្រឹកថ្ងៃអង្គារនេះ៕
២៖ សារព័ត៌មាន The Daily Post បានរាយការណ៍ថាមិនដល់ពីរសប្ដាហ៍ផងបន្ទាប់ពីក្រុមប្រតិបត្តិការ នៃគណៈកម្មការគយនីហ្សេរីយ៉ា បានកម្ចាត់ក្រុមមួយដែលបានលួចនាំចូលអាវុធជាង ១,០០០ដើម ទៅក្នុងប្រទេសនីហ្សេរីយ៉ាហើយនិងកុងតឺន័រមួយផ្សេងទៀតដែលមានផ្ទុកកាំភ្លើងពីប្រទេសតួកគី ក៏ត្រូវបានចាប់ឃាត់ទុកផងដែរ៕
៣៖ ប្រមុខការទូតវេណេស៊ុយអេឡា លោក ហ្សក អារៀហ្សា (Jorge Arreaza) បានប្រៀបប្រដូចពាក្យសម្តីរបស់ប្រធានាធិបតីអាមេរិក លោក ដូណាល់ ត្រាំ នៅឯមហាសន្និបាត អង្គការសហប្រជាជាតិក្នុងទីក្រុងញូយ៉ក កាលពីសប្តាហ៍មុននោះថា ជាការប្រកាសសង្រ្គាមសុទ្ធសាធជាមួយប្រទេសរបស់លោក ហើយលោក Arreaza បានសន្យាថានឹងចាត់វិធាន តបតទៅវិញ៕
៤៖ មកទល់ពេលនេះ ចំនួនមនុស្សកើនដល់ជាង ៥៧,០០០នាក់ បានភៀសខ្លួនចេញពីលំនៅឋានរបស់ពួកគេ ខណៈដែលភ្នំភ្លើងមួយកន្លែង នៅលើកោះទេសចរណ៍បាលី (Bali) របស់ប្រទេសឥណ្ឌូណេស៊ី ទំនងជានឹងអាចផ្ទុះឡើងនាពេលឆាប់ៗខាងមុខ៕
៥៖ប្រធានាធិបតីអាមេរិកលោក ដូណាល់ ត្រាំ នឹងជួបពិភាក្សាការងារជាមួយនាយករដ្ឋមន្ត្រីថៃ លោក ប្រាយុទ្ធ ចាន់ អូចា (Prayut Chan-o-cha) នៅឯសេតវិមាននៅថ្ងៃទី០៣ ខែតុលាខាងមុខនេះ៕
៦៖ ក្នុងអំឡុងពេលនៃការហោះ Flyby លើកទី០៨ ជុំវិញភពព្រហស្បតិ៍ (Jupiter) យានអវកាស Juno របស់អង្គការ NASA បានផ្តិតយករូបភាពស្អាតៗប្លែកភ្នែកបន្ថែមទៀត នៃបរិយាកាសពោពេញដោយព្យុះពពកកួចខ្មួលខ្មាញ់ របស់ភពឧស្ម័នយក្សមួយនេះ៕
៧៖ កងទ័ពអ៊ីរ៉ាក់បានធ្វើដំណើរទៅដល់ប្រទេសតួកគីហើយ ដើម្បីចូលរួមសមយុទ្ធយោធារួមគ្នា នៅតំបន់ព្រំដែនតួកគី-អ៊ីរ៉ាក់ បន្ទាប់ពីប្រទេសទាំងពីរបាន ព្រមានរដ្ឋាភិបាលឃើដដែល បានរៀបចំការបោះឆ្នោតប្រជាមតិប្រកាសឯករាជ្យ កាលពីថ្ងៃចន្ទ ខណៈលទ្ធផលនឹងត្រូវនៅ ៧២ម៉ោង បន្ទាប់បើគ្មានការប្រែប្រួល៕
