​(ម៉ូស្គូ)៖ សារព័ត៌មាន Politico និងក្រុមហ៊ុន​ស្រាវជ្រាវ Greenberg Quinlan Rosner Research បានចេញ​ផ្សាយនូវលទ្ធផល នៃការស្ទង់មតិមួយ​ដែលបង្ហាញថា ប្រជាជន​អង់គ្លេស ៥១ភាគរយ គាំទ្រឱ្យមាន​ការរៀបចំ​ការបោះឆ្នោតប្រជាមតិ ចាកចេញពី​សហភាពអ៊ឺរ៉ុប ឬ Brexit ជាលើកទី២ ខណៈ ៣៩ភាគរយជំទាស់នឹង​គំនិតនេះ។ នេះបើតាមការ​ចេញផ្សាយដោយ សារព័ត៌មាន​ Sputnik នៅរសៀលថ្ងៃអង្គារ ទី២៦ ខែកញ្ញា ឆ្នាំ២០១៧។

ការស្ទង់មតិខាងលើ​ចេញផ្សាយកាល​ពីថ្ងៃចន្ទ ក៏បានឱ្យ​ដឹងដែរថា ចំនួនប្រជាជន​អង់គ្លេស គិតថាលទ្ធផល​នៃអនាគតប្រទេសរបស់ខ្លួន បន្ទាប់ពី Brexit បានធ្លាក់ចុះ បានកើនដល់ ៤៦ភាគរយ រីឯអ្នកដែលប្រឆាំងនឹងគំនិតបង់​ប្រាក់ ៥០ពាន់លានផោន ឬ ៥៦.៦ពាន់លានដុល្លារ ក្នុងការផ្សះផ្សា​ការលែងលះជា​មួយសហភាពអឺរ៉ុប មានចំនួន ៦០ភាគរយ និងមានតែ ២៣ភាគរយ ទទួលយកគំនិតនេះ។

មិនតែប៉ុណ្ណោះ ប្រជាជន​អង់គ្លេស ៥៤ភាគរយ ក៏បានជំទាស់ផង​ដែរ​ចំពោះការបង់ប្រាក់ ៣០ពាន់លានផោន ឱ្យសហភាពអឺរ៉ុប ខណៈ​២៩ភាគរយគំាទ្រ។ ជាងនេះ​ទៅទៀត បើតាមការស្ទង់មតិនេះ​ដដែល ពួកគេបានបង្ហាញ​ការមិនសប្បាយចិត្ត​ ចំពោះទិសដៅ​ដែលប្រទេសរបស់​ពួកគេ​កំពុងដើរ ដោយក្នុងនោះ ៥២ភាគរយ គិតថា​ទិសដៅ​បច្ចុប្បន្នគឺ«ខុស» ហើយ​មានតែ ៣០ភាគរយយល់ថា «ត្រូវ»។

គួរបញ្ជាក់ថា ការស្ទង់មតិខាងលើ​ធ្វើឡើងនៅចន្លោះ​ពីថ្ងៃ១១ ដល់ថ្ងៃទី១៣ ខែកញ្ញា ជាមួយអ្នកផ្ដល់​សម្ភាសន៍ ១,២០០នាក់។ ចក្រភពអង់គ្លេស​បានបោះឆ្នោត​ប្រជាមតិស្ដពី Brexit​ កាលពី ឆ្នាំ២០១៦កន្លងទៅ ហើយកិច្ចចរចា​រវាងទីក្រុងឡុងដ៍ និងសហភាព​អឺរ៉ុប បានចាប់ផ្ដើមជាផ្លូវការ​កាលពីថ្ងៃទី១៩ ខែមិថុនា ក៏ដូចជាគ្រោង​នឹងបញ្ចប់នៅចុងខែមីនា ឆ្នាំ២០១៩៕