(ពិភពលោក)៖ នៅថ្ងៃព្រហស្បតិ៍ ទី១៤ ខែកញ្ញា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗជាច្រើនបានកើតឡើង រួម​មាន​ទាំង​ព្រឹត្តិការ​ណ៍​នយោបាយ និងស្ថានការណ៍ ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើ​ព្រឹត្តិ​ការណ៍​រូបភាពប្រ​ចាំ​ថ្ងៃ​នេះមានអ្វីខ្លះនោះសូមទស្សនាដូចខាងក្រោម៖

១៖ អគ្គីភ័យមួយបានឆាបឆេះសាលារៀនមួយកន្លែង ក្នុងរដ្ឋធានីគូឡាឡាំពួរ នៃ​ប្រទេសម៉ាឡេស៊ី​នៅវេលាម៉ោង ៥៖០០នាទីព្រឹក​ថ្ងៃព្រហស្បតិ៍នេះ ដោយបណ្តាលឲ្យមនុស្ស២៥នាក់​ស្លាប់ ដោយក្នុងនោះ​ភាគច្រើនជាសិស្សសាលា​ ដែលស្នាក់នៅក្នុងសាលារៀននោះ៕

២៖ បេសកកម្មនៃ​កែវយឺតអវកាស Kepler របស់អង្គការ NASA ឬហៅថា K2 ទើបតែប្រកាស​អំពីការរកឃើញភពថ្មីៗចំនួន ០៣ គោចរនៅជុំវិញព្រះអាទិត្យមួយ ដែលមានចម្ងាយ ៩៧ឆ្នាំពន្លឺ​ពីភពផែនដី​របស់យើង ហើយវាត្រូវបានចាត់បញ្ចូលជាភពប្រភេទ «Super Earth» មានតែទំហំធំជាងភពផែនដី ប៉ុន្តែតូចជាភពណិបទូន៕

៣៖ អគ្គលេខាធិការ​អង្គការសហប្រជាជាតិ អាន់តូនីញ៉ូ ហ្គូទែរ៉ែស (Antonio Guterres) បាននិយាយថា ប្រជាជនមូស្លីមរ៉ូហ៊ីងយ៉ា​នៅក្នុងប្រទេសមីយ៉ាន់ កំពុងប្រឈមមុខ​នឹងគ្រោះមហន្តរាយ​មនុស្សជាតិ ហើយលោកក៏បាន​អំពាវនាវផងដែរ​ឱ្យមីយ៉ាន់ម៉ាបញ្ឈប់ប្រតិបត្តិការ​យោធាប្រឆាំង​នឹងជនជាតិដើមភាគតិច​មួយនេះ៕

៤៖ កូរ៉េខាងជើងបានគំរាមប្រើប្រាស់​​អាវុធនុយក្លេអ៊ែរបាញ់ពន្លិច​ជប៉ុន​ឱ្យបាត់ចេញពីផែនទីពិភពលោក និងធ្វើឱ្យសហរដ្ឋអាមេរិក​ក្លាយជាផេះ សម្រាប់ការគាំទ្រដំណោះស្រាយ​ដាក់ទណ្ឌកម្ម​អង្គការសហប្រជាជាតិ​ប្រឆាំងទីក្រុងព្យុងយ៉ាង៕

៥៖ រុស្ស៊ី និងបេឡារុសចាប់ផ្តើមការធ្វើ​សមយុទ្ធយុទ្ធសាស្រ្ត​រួមគ្នា ដែលមានការចូលរួមពីកងទ័ពប្រមាណ ១២,៧០០នាក់ មក​ពី​ប្រទេស​​ទាំង​សងខាង៕

៦៖ មន្រ្តីប៉ូលិសការពារព្រំដែនថៃម្នាក់បានស្លាប់ និង១៨នាក់ផ្សេងបានទទួលរងរបូសធ្ងន់-ស្រាល បន្ទាប់ពីគ្រាប់បង្កៃ​​ចំនួន០៣គ្រាប់ ត្រូវបានគេបំផ្ទុះ​បន្តបន្ទាប់គ្នេ នៅខេត្តយ៉ាឡា (Yala) ភាគខាងត្បូង ប្រទេសថៃនាថ្ងៃព្រហស្បតិ៍នេះ៕