(រ៉ង់ហ្គូន)៖ ប្រធានក្រុមប្រឹក្សា​រដ្ឋមីយ៉ាន់ម៉ា លោកស្រី អោងសាន ស៊ូជី បានសម្រេចលុបចោល​គម្រោងចូលរួម និងថ្លែងសុន្ទរ​កថា​របស់​លោកស្រី នៅឯមហាសន្និបាត​នៃអង្គការសហប្រជាជាតិ (UNGA) លើកទី៧២ ក្នុងខែនេះ ដោយសារតែនៅជាប់ដៃជាប់ជើង នឹងបញ្ហារវាងជនជាតិភាគតិចរ៉ូហ៊ីងយ៉ា និងរដ្ឋាភិបាលតែម្តង។ នេះបើតាមការចេញ​ផ្សាយដោយទីភ្នាក់ងារ​ព័ត៌មានចិន ស៊ីនហួរ នៅព្រឹក​ថ្ងៃពុធ ទី១៣ ខែកញ្ញា ឆ្នាំ២០១៧។

ដំណឹងនេះ ត្រូវបានធ្វើឡើងដោយ​អគ្គលេខាធិការ នៃវិមានប្រធានាធិបតី​មីយ៉ាន់ម៉ា លោក យូ ស ហាតាយ (U Zaw Htay) កាលពីយប់ថ្ងៃអង្គារ​​ម្សិលមិញ។ បើតាមការឲ្យដឹង​របស់ លោក Htay អនុប្រធានាធិបតី​មីយ៉ាន់ម៉ា លោក យូ ហេរី វ៉ាន់ ធីអូ (U Henry Van Thio) នឹងត្រូវអញ្ជើញទៅ​ចូលរួមព្រឹត្តិការណ៍កិច្ចប្រជុំអន្តរជាតិនេះ និងធ្វើការថ្លែងសុន្ទរកថា ជួសមុខឲ្យប្រទេសមីយ៉ានម៉ា នាថ្ងៃទី២០ ខែកញ្ញានេះ។

គួរបញ្ជាក់ថា ការលុបចោលដំណើរ​ចូលរួមដ៏សំខាន់នេះ បានកើតមានឡើង​ចំពេលដែលវិបត្តិ​ជម្លោះជាតិសាសន៍ នៅក្នុង​រដ្ឋ​ភាគខាងជើង​ប្រទេស កំពុងតានតឹងជា​ខ្លាំង ដោយមានមនុស្ស​ស្លាប់រាប់រយនាក់ ហើយជនជាតិដើម​ភាគតិចមូស្លីមរ៉ូហ៊ីង​យ៉ា​​ប្រមាណ ៣៧០,០០០នាក់ បានរត់ភៀសខ្លួន​ទៅកាន់​ប្រទេសបង់ក្លេដែស ដែលនៅក្បែរខាង ខណៈលោកស្រី ស៊ូជី កំពុងរង​ការរិះគន់យ៉ាង​ចាស់ដៃ និងត្រូវមនុស្សរាប់សែននាក់ មានបំណងដកពានរង្វាន់ណូបែលសន្តិភាព​របស់ស្រី វិញថែម​ទៀត​ផង​៕