(បរទេស)៖ នៅថ្ងៃអង្គារ ទី១២ ខែកញ្ញា ឆ្នាំ២០១៧ ព្រឹត្តិការណ៍អន្តរជាតិសំខាន់ៗ ​ជាច្រើនបានកើត​មាន​ឡើង​​ដែល​មានដូចជា គ្រោះធម្មជាតិ ព្រឹត្តិការណ៍ក្តៅគគុកនៃភ្លើងសង្គ្រាម ព្រមទាំងការប្រឈមមុខ​ដាក់​គ្នា ​រវាង​មហា​អំណាចធំៗ​នៅលើសកលោក ដែលបង្កឲ្យស្ថានការណ៍​ជារួម​មានភាពក្តៅគគុកខ្លាំងឡើង។ ដូច្នេះបើចង់ដឹងថា តើព្រឹត្តិ​ការណ៍​រូបភាពប្រ​ចាំ​ថ្ងៃនេះ​មាន​អ្វី​ខ្លះ​នោះ​សូមទស្សនា​​ដូច​​ខាង​ក្រោម៖

១៖ ទីបំផុតក្រុមប្រឹក្សាសន្តិសុខ UN សម្រេចដាក់ទណ្ឌកម្មថ្មី ប្រឆាំងនឹងកូរ៉េខាងជើង តបតាមសំណើរបស់អាមេរិក ជុំវិញ​ការ​បំផ្ទុះក្បាលគ្រាប់នុយក្លេអ៊ែរ កាលពីថ្ងៃទី០៣ ខែកញ្ញា។

២៖ ទីក្រុង Makati ភាគអាគ្នេយ៍រដ្ឋធានីម៉ានីល នៃប្រទេសហ្វីលីពីន កំពុងរងគ្រោះទឹកជំនន់ ដោយសារឥទ្ធិពលព្យុះ​ត្រូពិច​​កាលពីពេលថ្មីៗនេះ។

៣៖ ដើមឈើធំៗជាច្រើនដើម ដួលរលំនៅក្នុងតំបន់មួយ បន្ទាប់ពីព្យុះ Hurricane Irma ដ៏ខ្លាំងក្លា វាយបោកបក់ឆ្លងកាត់ នៅ​ក្នុង​ទីក្រុង Miami នៃរដ្ឋផ្លូវរីដា សហរដ្ឋអាមេរិក។

៤៖ ប៉េរូធ្វើតាមម៉ិចស៊ីកូ ដោយសម្រេចបណ្តេញមន្ត្រីទូតកូរ៉េខាងជើងចេញពីប្រទេស ឆ្លើយតបនឹងការបំផ្ទុះនុយក្លេអ៊ែរ។

៥៖ រុស្ស៊ីប្រាប់ទៅអាមេរិកថា ឈប់បំផ្លាញមិត្តភាពរវាងយើងទៀតទៅ ហើយចាប់ផ្ដើមដោះស្រាយបញ្ហា​ដែលអ្នកបង្កឡើង ក្នុងជំនួបរវាងអនុរដ្ឋមន្រ្តីការបរទេសប្រទេសទាំងពីរ នៅហ្វាំងឡង់។

៦៖ ទីបំផុតបញ្ហាអំពើហិង្សានៅមីយ៉ាន់ម៉ា ត្រូវបញ្ជូនទៅដោះស្រាយនៅចំពោះមុខ UN ហើយ ខណៈជនភៀសខ្លួនរ៉ូហ៊ីងយ៉ា កើនដល់ជាង ៣សែននាក់។

៧៖ តួកគីអះអាងថា កិច្ចព្រមព្រៀង និងការបង់ប្រាក់ទិញប្រព័ន្ធការពារមីស៊ីលរុស្ស៊ី S-400 ត្រូវបានសម្រេចរួចរាល់ រង់​ចាំ​តែ​ថ្ងៃបញ្ជូនមកតែប៉ុណ្ណោះ៕